قايرات نۇرتاس مەيرامبەكتەي انشىلەردىڭ قادىرىن كەش تۇسىنبەۋدى ايتتى
قايرات نۇرتاس بالا كۇنىندە ۇلىقپان جولداسوۆ، مەيرامبەك بەسپايەۆ، ساكەن مايعازيەۆ، بۇركىت سىندى اعالارىنا ەلىكتەپ وسكەنىن ايتادى. ءتىپتى ءبىر كەزدەرى قايتارىمىنا مەيرامبەك بەسپايەۆتان سىيلىق الۋ ءۇشىن وعان قولىنداعى بارىن ۇسىنعان ەكەن.
ارتىنشا ونەردەگى اعاسى ءىنىسىنىڭ نيەتىن ءتۇسىنىپ، وعان قولىنداعى ساعاتىن تارتۋ ەتكەن. ءانشى ونەردەگى اعالارىنا بۇگىندە دە ەلىكتەيتىنىن ايتىپ، ولارعا دەگەن العىسىن ءبىر اۋىز تىلەگىمەن جەتكىزدى.
«بالا كەزدەن ءانىن تىڭداپ، ەلىكتەگەن اعالارىمىزبەن بۇگىن دە، اللانىڭ قالاۋىمەن، كۇندە كەزدەسىپ، پىكىر الماسىپ ءجۇرمىز! «كۇندە كورگەن تاۋدىڭ بيىكتىگى بايقالمايدى» دەگەن بار! وسىنداي اعالارىمىزدىڭ قادىرىن كەش تۇسىنۋدەن، ۋاقىتىندا ساي قۇرمەت كورسەتپەۋدەن ساقتاسىن!
قازاقتىڭ ماڭدايىنا باق بوپ بىتكەن اعا-اپكەلەرىم امان بولسىن! مەيرامبەك اعامنىڭ مەن ءۇشىن ورنى ەرەكشە! كەزدەسكەندە بەتتەرىڭىزگە ايتپاسام دا، ىنىلىك اق كوڭىلىمدى، قۇرمەتىمدى وسىلاي قابىل الىڭىزدار!» - دەيدى قايرات نۇرتاس.
ءانشىنىڭ بۇل جازباسىن وقىعان جەلى قولدانۋشىلارى ونىڭ كىشىپەيىلدىلىگىنە ريزا بولدى. قوس انشىگە ۇزاق عۇمىر مەن شىعارماشىلىق تابىس تىلەدى.
«جارايسىڭ! اللا تاعالام سەنى دە ءدال سونداي بيىكتەرگە جەتەلەسىن. ءاردايىم ساتتىلىك جانىڭدا بولسىن!»، «قازاقتىڭ قوس ماقتانىشى! ارمان- ماقساتتارىڭا جەتىڭدەر!»، «قايرات، سەن كەرەمەت جانسىڭ!»، «قايرات، مەيرامبەك - قازاقتىڭ قوس ماقتانىشى، قايدا جۇرسەڭىزدەر دە امان جۇرىڭىزدەر!» دەيدى ولار.
