نيسساداعى تەراكتىدە قاتتى قورىققان ايەل بوسانىپ قالدى

استانا. قازاقپارات - فرانسيانىڭ نيسسا قالاسىنداعى تەراكت كەزىندە انگليالىق جاعالاۋدا ايەل بوسانىپ قالعان.

بۇل تۋرالى today.kz حابارلايدى.

بوسانعان ايەل جانە مىڭداعان ادام وزدەرىنە قاراي باعىتتالعان جۇك كولىگىنەن قاشىپ قۇتىلۋعا تىرىسقان. جاس كەلىنشەك جۇكتىلىكتىڭ توعىزىنشى ايىندا بولىپتى. قاتتى قورىققاننان ونىڭ تولعاعى باستالىپ كەتكەن. جاعالاۋدا ورنالاسقان مەيرامحانا قىزمەتكەرلەرى جاس بوسانعان ايەلدى اس ۇيگە اۋىستىرىپ، عيماراتتى بوگدە ادامداردان قورعاعان.

مەكەمە باسشىسى ۇلىنىڭ ايتۋىنشا، ادامدار ءتىپتى توڭازىتقىشقا كىرىپ جاسىرىنعان. ال دارىگەر ايەلدى ەدەندە بوساندىرىپ العان. سوسىن قۇتقارۋشىلار كەلىپ، بالاسى ەكەۋىن الىپ كەتەدى.

ەسكە سالا كەتسەك، 14- شىلدە كۇنى نيسسا قالاسىندا جۇك كولىگى ساعاتىنا 60-70 شاقىرىم جىلدامدىقپەن ادامدار كوپ شوعىرلانعان ورتاعا كەلىپ سوعىپ، اسا كۇشتى تەراكت جاسادى. ناتيجەسىندە 80 نەن استام ادام كوز جۇمدى.

بۇعان دەيىن اتالمىش تەراكت بارىسىندا قازاقستاندىق ناتاليا ەسىمدى ازاماتشانىڭ قايتىس بولعانى حابارلانعان ەدى. سونداي-اق، نيسسادا جۇرگەن پاۆلودارلىق وتباسى دا وقيعادان سوڭ بايلانىسقا شىقپاي قالعان. نيسساداعى لاڭكەستىكتىڭ كۋاسى بولعان قانداسىمىز دا باسىنان كەشكەنىن بايانداپ بەرگەن بولاتىن.