نيسسادا جوعالىپ كەتكەن قازاقستاندىق وتباسى ازىرگە تابىلعان جوق - ق ر س ءى م

استانا. قازاقپارات - تەراكت كەزىندە نيسسادا بولعان قازاقستاندىق ءۇش ازاماتتىڭ قايدا ەكەنى ازىرگە انىقتالعان جوق.

بۇل تۋرالى قازاقپارات تىلشىسىنە ق ر سىرتقى ىستەر مينيسترلىگىنىڭ باسپا ءسوز قىزمەتى حابارلادى.

«ازىرگە نيسسادا جوعالعان وتباسى جونىندە ەش اقپار بولماي تۇر. ىزدەۋ جۇمىستارى جالعاسۋدا. ىزدەۋدى ءبىزدىڭ ديپلوماتتار جۇرگىزۋدە»، - دەپ اتاپ ءوتتى ق ر س ءى م باسپا ءسوز حاتشىسى انۋار جايناقوۆ.

ايتا كەتەيىك، ءتورت ادامنان تۇراتىن قازاقستاندىق وتباسى - اتاسى، اجەسى، قىزى مەن نەمەرەسى نيسساعا پاۆلوداردان بارعان. بەيسەنبى كۇنى (تەراكت كۇنى - رەد.) اتاسى ۇيدە قالعان، ال اجەسى، قىزى مەن نەمەرەسى قالاعا قىدىرۋعا كەتىپ، سودان كەيىن قايتىپ ورالماعان.

قازىر قازاقستاندىق ديپلوماتتار فرانسۋز بيلىگىنىڭ كومەگىمەن ولاردى ىزدەۋ جۇمىستارىن جالعاستىرىپ جاتىر.