راحىم وشاقبايەۆ تۇركياداعى توڭكەرىس كەزىندە ستامبۇل اۋەجايىندا قانداي احۋال بولعاندىعىن ايتىپ بەردى
اۋەجايدا سول الاساپىران ۋاقىتتا نە بولعانىن ول ءوزىنىڭ Facebook-تەگى پاراقشاسىندا جازىپ قالدىردى.
«قازىرگى ۋاقىتتا ازىرگە تۇركياعا ات باسىن بۇرماۋعا كەڭەس بەرەمىن. اسىرە سىلتەگەنىم ەمەس، ءبىراق مۇندا قاۋىپسىز ەمەس سەكىلدى. الماتىدان ستامبۇلعا كەشكى ساعات 9 دا كەلگەن ارىپتەستەرىممەن بۇل وقيعانى ءجىتى تالقىلاۋعا مۇمكىندىك تۋدى. ءبىز Koc University-گە وقۋعا اتتانىپ بارا جاتقان بولاتىنبىز.
مەن Fast Track ارقىلى ءتولقۇجات باقىلاۋىنا جىلدام وتۋگە مۇمكىندىك الدىم جانە اسكەريلەر اۋەجايدى جاراردىڭ 15 مينۋت الدىندا عانا ءوتىپ كەتىپپىن. ال مەنىڭ ارىپتەستەرىم ءتولقۇجات باقىلاۋىنا ءوتۋ ءۇشىن كەزەكتە 2 ساعات تۇردى، ولارعا اۋەجايدا قالۋدان باسقا امال بولمادى. ناتيجەسىندە، ولار كامپۋسقا تاڭعى 8 دە ءبىراق كەلدى»، - دەدى ر. وشاقبايەۆ الەۋمەتتىك جەلىدە.
ونىڭ سوزىنە قاراعاندا، ستامبۇل اۋەجايىنداعى جاعداي تولىقتاي باقىلاۋدان شىعىپ كەتكەن.
«ساعات 11 دە (كەشكى - اگەنتتىك) كىرۋ جانە شىعۋ باعىتتارىن جاۋىپ تاستاعان، اۋەجايدا قىرۋار ادام جينالىپ قالدى. شامامەن 12 لەردە جۇزدەگەن ادام قارۋ اتىپ كىرگەن. اۋەجايداعى ادامدار تۇركيادا اسكەري توڭكەرىس جاسالىپ جاتقاندىعىنان حابارسىز ەدى جانە بۇل د ا ي ش سودىرلارىنىڭ لاڭكەستىك ارەكەتى دەپ ەسەپتەگەن. ۇرەيلەنگەن جولاۋشىلار دا، اۋەجاي قىزمەتكەرلەرى دە جۇكتەرىن تاستاپ، قۇلاپ قالعان ازاماتتاردى تاپتاي باسىپ، ورتالىق كىرەبەرىستەن قاشا جونەلدى. ولار دۇكەندەرگە تىعىلىپ، پانا تاباتىن جەر ىزدەدى. ادامدار ايعايلاپ، ايەلدەر مەن بالالار جىلاپ جاتتى. كىرىپ كەلگەن اسكەريلەردى كورگەن حالىق ەسكالاتوردان تومەن قاراي جۇگىرىپ، ول جەردە ادامداردىڭ ءنوپىرى ءبىرىن-ءبىرى باسىپ جاتتى. دۇكەن ساتۋشىلارى تۋريستەردى جاسىرۋعا تىرىستى. ادامدار جەردە جاتتى.
تۋريستەر قايدان پانا تابارلارىن بىلمەي دال بولدى، ءبىرى جارىلىس قاۋپىنەن ۇرەيلەنىپ، اۋەجايدان قاشۋ كەرەك دەپ شەشتى، ەكىنشىسى سىرتتا اتىس بولۋى ىقتيمال دەپ اۋەجايداعى دۇكەندەردە تىعىلدى. ازاماتتاردى جارتىسى اۋەجاي سىرتىنا قاراي قاشتى. دەگەنمەن، قالاعا شىعاتىن مۇمكىندىكتەرى بولمادى. ارىپتەستەرىمنىڭ سوزدەرى بويىنشا، ادامدار تۋعان-تۋىستارىنا تەلەفون شالىپ جاتتى، سەبەبى ولار ءتىرى قالماۋىمىز دا مۇمكىن دەپ ويلادى»، - دەپ اتاپ ءوتتى ول.
ۇرەي شامامەن ءبىر ساعاتتان سوڭ، اۋەجايداعىلار قانداي وقيعا ورىن العاندىعىن بىلگەننەن كەيىن سەيىلگەن.
«انىقتالعانىنداي، «اۋەجايعا ەنتەلە كىرگەن ادامدار - توڭكەرىسكە قارسى شىققان ەردوعاننىڭ جاقتاستارى ەكەن. ولار ەشكىمدى ولتىرگەن جوق، ۇرىپ-سوعۋ بولعان جوق، الايدا وزدەرى تىم سۇستى بولدى. اۋەجاي قىزمەتكەرلەرى ادامداردىڭ تاستاپ كەتكەن جۇكتەرىن زال ورتاسىنا جينادى. ءبىراق كەيبىر ادامدار جۇكتەرىن تابا المادى، مۇمكىن باسقا ازاماتتار ونى قاربالاس كەزدە قاتەلەسىپ، الىپ كەتكەن بولۋى كەرەك. شامامەن تاڭعى ساعات 4 تە مەترو اشىلدى جانە تۋرسيتەردىڭ قالاعا شىعۋلارىنا مۇمكىندىك جاسالدى. مەترودا قاۋىپ بولعاندىقتان، پويىزدار كوپتەگەن ستانسالاردا جارىقتارىن قوسىپ، ءوتىپ كەتتى. ءبىزدىڭ ارىپتەستەرىمىز مەتروعا جەتكەننەن كەيىن، اۋەجايدا جارىلىستار ورىن العان. ول تۋرالى ءجىتى اقپارات ءالى بەلگىسىز.
ستامبۇل اۋەجايىندا ورىن العان وقيعا تۇركيا بيلىگىنىڭ قاۋىپسىزدىك ەلەمەنتتەرىنە قاتىستى باقىلاۋدى تولىقتاي جوعالتىپ العاندىعىن كورسەتەدى جانە جولاۋشىلار مۇلدەم قورعانسىز كۇيدە قالدى. تۇركيانىڭ سىرتقى جانە ىشكى احۋالىنا قاتىستى قاتەرلەردى ەسكەرە وتىرىپ، ستامبۇل اۋەجايى ازاماتتار ءۇشىن قاۋىپسىز ەمەس دەگەن ۇيعارىم جاساۋعا بولادى»، - دەپ ءتۇيدى ر. وشاقبايەۆ.
اۆتور: جاسۇلان جولدىبايەۆ
