الماتىلىق بالەرينا قازاقستان تاريحىندا تۇڭعىش رەت ايتۋلى حالىقارالىق بايقاۋدىڭ جەڭىمپازى اتاندى
نيۋ-يورك قالاسىنداعى (ا ق ش) حالىقارالىق بالەت ارتيستەرى بايقاۋىنىڭ لاۋەراتى اسەل اسقاروۆا ىستامبۇل قالاسىندا (تۇركيا) وتكەن 5-حالىقارالىق بالەت ارتيستەرى بايقاۋىندا ءبىرىنشى ورىندى جەڭىپ الىپ، التىن مەدالگە يە بولدى.
تۇركيادان كەشە عانا ۇشىپ كەلگەن اسەل اسقاروۆا مەن ونىڭ ساحناداعى ارىپتەسى ءارى ومىرلىك جولداسى ازامات اسقاروۆ بۇگىن الماتىدا باسپا ءسوز ءماسليحاتىن وتكىزدى. وعان جاس ارتىستەردىڭ پەداگوگى، قازاقستاننىڭ ەڭبەك سىڭىرگەن قايراتكەرى ساۋلە راحمەدوۆا دا قاتىستى.
«اسەلدىڭ بۇل جەڭىسى ءبىزدىڭ تەاتر ءۇشىن تاريحي وقيعا. ويتكەنى، ەرلەر اراسىندا مۇنداي جەڭىستەر بولعان. ال قىزدار اراسىندا، ەگەر جاڭىلىسپاسام، مۇنداي التىن مەدال بولعان ەمەس. اسەل تەاتر تاريحىنىڭ جاڭا بەتىن اشىپ وتىر»، - دەدى ماقتانىش سەزىممەن س. راحمەدوۆا.
ءوز كەزەگىندە اسەل بايقاۋ بارىسىندا قاتتى قوبالجىعانىن جاسىرمادى.
«بايقاۋ وتە كۇشتى بولدى. وكىنىشكە قاراي، ساۋلە اپايىمىز بىزبەن بىرگە ىستامبۇلعا بارا المادى. ءبىراق، مەن پەداگوگىما كۇنىنە 3-4 رەت تەلەفون ارقىلى حابارلاسىپ، جان تولعانىستارىمدى جەتكىزىپ وتىردىم. ول مەنەن اقىل-كەڭەستەرىن ايامادى. ءبىرىنشى تۋر اياقتالعان سوڭ قاتتى قوبالجىدىم. «ەكىنشى تۋرعا وتپەيتىن شىعارمىن» - دەپ ويلادىم. ءبىراق، كەيىن وتكەنىمدى كورىپ قاتتى قۋاندىم. مەن بۇل بايقاۋعا بۇعان دەيىن 2008-جىلى 16- جاسىمدا قاتىسقانمىن. ول جولى تاجىريبەمنىڭ ازدىعىنان ءۇشىنشى تۋردان وتە الماپ ەدىم. بۇل جولى جولىم بولدى. سوعان قاتتى قۋاندىم»، - دەدى اسەل.
ساۋلە راحمەدوۆا بۇل بايقاۋعا قاتىسۋدىڭ ءوزى ەرلىك ەكەندىگىن جەتكىزدى. ويتكەنى، بايقاۋ الدىندا وعان بارۋ-بارماۋ ماسەلەسى تۋىنداعان ەكەن.
«بايقاۋعا نەگىزى ارتىستەر 50 شاقتى ەلدەن كەلۋى كەرەك بولاتىن. ءبىراق، لاڭكەستىك قاۋىپ-قاتەرگە بايلانىستى 20 عا جۋىق قاتىسۋشى كەلمەي قالدى. بۇل، ارينە، پسيحولوگيالىق تۇرعىدان قاتتى اسەر ەتەدى. سوعان قاراماستان ءبىز اسەل مەن اسقاردى بايقاۋعا جىبەردىك. ءبىر اپتاعا سوزىلعان ءدۇبىرلى دوداداعا 35 سوليست قاتىستى. اسەل بايقاۋدا كورسەتكەن ونەرى جونىندە ماعان بەينەتاسپالار جىبەرىپ وتىردى. مەن سولارعا قاراپ، وعان اقىل-كەڭەستەرىمدى بەرىپ وتىردىم»، - دەدى س. راحمەدوۆا.
ال، اسەلدىڭ ساحناداعى ارىپتەسى بولعان ازامات اسقاروۆ بايقاۋدىڭ جوعارى دارەجەدە ۇيىمداستىرىلعاندىعىن ايتتى.
«بارلىعى جوعارى دارەجەدە ۇيىمداستىرىلدى. بىزگە تاۋلىكتىك اقى تولەنىپ وتىردى. اسەل ەكەۋمىزگە بۇل جەتكىلىكتى بولدى. ءبىز ءبىرىنشى تۋردا «كورسار» بالەتىنەن پا-دە-دە پارتياسىن كورسەتتىك. ارينە، تولقۋ بولدى. ءبىراق، لايىقتى دارەجەدە كورسەتتىك دەپ ويلايمىن. ودان كەيىن «پارالەلدەر» زاماناۋي ءنومىرىن كورسەتتىك. ەكىنشى تۋردا «جيزەل» بالەتىنەن جيزەلدىڭ پارتياسىن ورىنداپ شىقتىق. ول قازىلار القاسى تاراپىنان جوعارى باعاعا يە بولدى»، - دەدى ازامات اسقاروۆ.
اۆتور: ايبوتا جاپپاربەرگەن
