شىمكەنتتە «قازاق كىلەمدەرى» برەندى قالىپتاسادى
بۇل يمپورتتىق شيكىزاتقا دەگەن تاۋەلدىلىكتى ازايتىپ، شىعارىپ جاتقان ءونىمىنىڭ وزىندىك قۇنىن 15 پايىزعا دەيىن ارزانداتۋعا مۇمكىندىك بەرەدى. ەندى قازاقي ويۋ-ورنەك باسىلعان كىلەمدەر توقىلىپ، «قازاق كىلەمدەرى» دەگەن برەندتى قالىپتاستىرا باستادى.
توقىلعان كىلەمدەردى رەتتەپ، ساتۋشىعا جونەلتۋ ءۇشىن دوڭگەلەك ەتىپ ورايتىن سالتانات بەرديار قىزى جۇمىسقا جاقىندا ورنالاسىپتى. جۇمىسى وزىنە ۇنايدى.
سالتانات بەرديار قىزى، وپەراتور:
- مەن شىعارىپ جاتقان ويۋ- ورنەكتى، ادەمى كىلەمدەر ادامدارعا قۋانىش سىيلايدى، كوڭىلىن كوتەرەدى. سول ءۇشىن دە مەن وسى جەردە ىستەپ جاتقانىما قۋانىشتىمىن. جانە ايلىعىم دا جاقسى.
فابريكا العاشىندا كىلەم توقۋعا كەرەكتى ءجىپتى تەك شەتەلدەن ساتىپ الاتىن. ونىڭ ماشاقاتى كوپ ەكەن. دامۋدىڭ ەكىنشى كەزەڭىندە سول ءجىپتى شىعارىپ، يىرەتىن ءوندىرىستى ىسكە قوستى. قازىر ول تولىق كۇشىمەن جۇمىس ىستەۋگە كوشكەن.
قۋان ىسقاقوۆ، كىلەم فابريكاسىنىڭ كوممەرتسيالىق ديرەكتورى:
- سونىڭ ارقاسىندا ءبىز قازىر ءوزىمىزدىڭ كىلەمدەردىڭ 10 پايىزدان اسا باعاسىن ارزانداتا الدىق. بۇل ءبىر جاقسى جاعى. ەكىنشى جاقسى جاعى بار، سونىڭ ارقاسىندا ءبىز الۋان، ءتۇرلى- ءتۇستى كىلەمدەر شىعارۋعا مۇمكىندىگىمىز بولدى.
فابريكا وتكەن جىلى 2,2 ميلليون شارشى مەتر كىلەم توقىپتى. «بيىل ودان الدەقايدا كوپ شىعارامىز»، - دەپ وتىر. ويتكەنى ونىمدەرى شەتەلگە كوپتەپ ساتىلا باستاعان. ورتا ازيا ەلدەرى، رەسەيدەن كوپ تاپسىرىس تۇسكەن. حالىقارالىق كومپانيامەن كەلىسىپ، ەۋروپا ەلدەرىندە دە ساۋدالاپ جاتىر. ارينە ساپاسى جوعارى بولعان سوڭ. ول جاقتاعى تۇتىنۋشىلارى قازاقتىڭ ويۋى باسىلعان كىلەمدەرىنە قىزىعاتىن كورىنەدى.
تالعات ىسقاقوۆ، كىلەم فابريكاسىنىڭ باس ديرەكتورى:
- قازاقتىڭ ءار ويۋىندا ماعىنا بار. سول قازاقى ويۋ- ورنەكتى پايدالانىپ، «قازاق كىلەمدەرى» دەگەن برەند جاساعىمىز بار. ونى تەك ءوز ەلىمىزدە ەمەس، الەمگە تانىتۋ.
كىلەم فابريكاسى بىلتىر «التىن ساپا» بايقاۋىندا قاتىسىپ، «حالىق تۇتىناتىن تاۋار» اتالىمى بويىنشا ەكىنشى دارەجەلى ديپلوممەن ماراپاتتالدى. بۇل جۇمىستى ۇتىمدى ۇيىمداستىرا بىلگەننەن. ال وسى جارتىجىلدىقتا ەڭ ۇزدىك سالىق تولەۋشى كاسىپورىن اتانعانى تاعى بار.
www.khabar.kz
