شىمكەنت مەكتەپتەرىندە وقۋشىلاردىڭ سمارتفون قولدانۋىنا تىيىم سالىنۋى مۇمكىن

استانا. قازاقپارات - شىمكەنت قالاسىنداعى مەكتەپتەردە وقۋ جىلىندا وقۋشىلاردىڭ سمارتفون قولدانۋىنا تىيىم سالىنۋى مۇمكىن.

بۇل جونىندە قالالىق اكىمدىكتە وتكەن ۇلكەن جيىندا ايتىلدى.

قالا اكىمدىگىنىڭ كەزەكتى ماجىلىسىندە كامەلەتكە تولماعاندار اراسىندا قۇقىق بۇزۋشىلىق پەن قىلمىستىڭ الدىن الۋ كۇن تارتىبىنە قويىلدى. شاھار باسشىسى عابيدوللا ءابدىراحىموۆتىڭ توراعالىعىمەن وتكەن جيىندا قالالىق ءبىلىم ءبولىمىنىڭ باسشىسى جانات تاجيەۆا بايانداما جاسادى.

قالانىڭ باس مۇعالىمى مەكتەپ وقۋشىلارى اراسىنداعى قىلمىستىڭ تۋىنداۋىنا ءبىر جاعىنان ينتەرنەتپەن بايلانىسقا شىعاتىن سمارتفوندار سەبەپ بولىپ وتىرعانىن دا ايتىپ، اتا- انالار كوميتەتى ارقىلى بۇل ماسەلەگە توسقاۋىل قويۋ جاعىن كوتەردى.

«ءبىلىم ءبولىمى مەن قۇقىق قورعاۋ ورگاندارى بىرلەسىپ جۇمىس ىستەۋىنىڭ ناتيجەسىندە قالامىزدا جاسوسپىرىمدەر اراسىنداعى قىلمىستى ازايتۋ جۇمىستارى وڭ ناتيجە بەرىپ كەلەدى»، - دەيدى جانات ارىسبەك قىزى. بۇعان مىسال رەتىندە 2016-2017 وقۋ جىلىنا ارنالعان كەشەندى ءىس- شارا جوسپارى بويىنشا كامەلەتكە تولماعان وقۋشىلارعا جانە ولاردىڭ زاڭدى وكىلدەرىنە قۇقىقتىق كەڭەس بەرۋ جادىناماسى جاسالعانىن العا تارتتى. بۇعان قوسا ۇزدىك مەكتەپتەردىڭ تاجىريبەسى جيناقتالىپ، مەكتەپ پسيحولوگتارىنا، سىنىپ جەتەكشىلەرىنە، اتا- انالارعا جانە وقۋشىلارعا ارنالعان ادىستەمەلىك نۇسقاۋلىقتار دايىندالعان.

«اتا- انالار مەن ءبىلىم مەكەمەلەرى اراسىنداعى پىكىرلەسۋدى دامىتۋ ءۇشىن ءبىلىم ءبولىمى جانىنان 87718285885 ءنومىرى ارقىلى «WhatsАpp»  قىزمەتى ىسكە قوسىلدى. وعان كەلىپ تۇسكەن اقپاراتتار نەگىزىندە جۇيەلى جۇمىستار جۇرگىزىلىپ جاتىرمىز»، - دەدى جانات ارىسبەك قىزى.

ءبىلىم ءبولىمى باسشىسىنىڭ ايتۋىنشا، وسكەلەڭ ۇرپاق ءۇشىن وتباسىنداعى تاربيەدەن تىس ءوزىن قورشاعان ورتاداعى تاربيەنىڭ دە ماڭىزى زور ەكەنى ەسكەرىلە كەلە بيىلعى 25 -تامىزدان باستاپ قالا اۋماعىنداعى حالىق كوپ شوعىرلاناتىن ورىندارعا، كوشە بويلارىنا بەينەروليكتەر مەن باننەرلەردى ورنالاستىرۋ ءۇشىن ىشكى ساياسات بولىمىنە ۇسىنىس ەنگىزىلگەن.

سونىمەن قاتار جانات ارىسبەك قىزى ىشكى ىستەر باسقارماسى، قالاعا قاراستى اۋدان اكىمدىكتەرى، جولاۋشىلار كولىگى جانە اۆتوموبيل جولدارى ءبولىمى، ىشكى ساياسات ءبولىمى، دەنساۋلىق ساقتاۋ باسقارماسى مەن ۇكىمەتتىك ەمەس ۇيىمدار وكىلدەرىن بىرلەسىپ، ۇرپاق تاربيەسىنە باسا نازار اۋدارۋعا شاقىردى، دەپ جازادى otyrar.kz.