استانادا «تارتىمدى رومانس» كونسەرتى وتەدى

استانا. قازاقپارات - العاشقى نوتاسىنان-اق تانۋعا بولاتىن، مۋزىكانتتاردىڭ بىرنەشە بۋىنىن شىڭداعان اۋەندەر «تارتىمدى رومانس» كونسەرتىنىڭ باعدارلاماسىنا ەنگىزىلدى.

ەلىكتىرىپ اكەتەتىن كەش «استانا وپەرا» تەاترىنىڭ كامەرالىق زالىندا وتەدى. - ءاربىر رومانس تەرەڭ سەزىمگە تولى اقپارات بەرەدى. بۇل مۋزىكا تىڭدارماندى مەيىرىمدىلىككە، قارىم- قاتىناستاعى تازالىققا تاربيەلەپ، ادامدى ليريكالىق ۇيلەسىمدىلىككە باعىتتايدى. ءبىزدىڭ كونسەرتىمىزگە كەلگەن كورەرمەندە مىندەتتى تۇردە پوزيتيۆتى سەزىم پايدا بولادى، ولار جاقسى كوڭىل-كۇيدەن قۋات الادى. اتالعان كەشتە مەن پ. ي. چايكوۆسكي، س. ۆ. راحمانينوۆ، م. ي. گلينكانىڭ رومانستارىن ورىندايمىن، - دەيدى قازاقستاننىڭ ەڭبەك سىڭىرگەن قايراتكەرى بايعالي مومبەكوۆ.

سونداي-اق، كامەرالىق زالدىڭ ساحناسىنا تالانتتى ورىنداۋشىلار -  «استانا وپەرا» تەاترىنىڭ سوليستەرى -  سوپرانو ەلەنا نيزامۋتدينوۆا، مەسسو- سوپرانو تاتيانا ۆيسينسكايا، باريتون ەسكەندىر ءابجانوۆ شىعادى. رومانستىڭ كلاسسيكالىق كامەرالىق نۇسقاسى فورتەپيانونىڭ (راۋشان بەسكەمپىروۆا) جانە گيتارانىڭ (ءالىبي اساقايەۆ) سۇيەمەلدەۋىمەن ورىندالادى. كەش باعدارلاماسىندا ا. اليابيەۆ، ا. ۆارلاموۆ، پ. بۋلاحوۆ، ا. گۋريليەۆ، ە. فوميننىڭ كونە رومانستارى، م. گلينكا، ن. ريمسكي- كورساكوۆ، پ. چايكوۆسكي، تاعى باسقا ورىس كلاسسيكتەرىنىڭ بەلگىلى شىعارمالارى، مۇنىمەن قاتار كينوفيلمدەردەن قازىرگى زامانعى رومانستار ورىندالادى. سونداي-اق، اتالعان كەشتە كورەرمەنگە ا. ا. دەلۆيگتىڭ سوزىنە جازىلعان ايگىلى «بۇلبۇل» رومانسى ۇسىنىلادى. 1825 -جىلى جازىلعان مۋزىكانىڭ تانىمال بولعانى سونشالىق، كوپشىلىك ونى حالىق مۋزىكاسى دەپ قابىلدادى. رومانستا سۇيىكتىسىنەن ايىرىلعان سۇلۋدىڭ ماحابباتتان تۇڭىلگەنى جانە شابارمان بۇلبۇل جايىندا ايتىلادى، مۋزىكا سول كەزدەردىڭ ءان جيناقتارىنان تابۋعا بولاتىن حالىق ءانىنىڭ ۇلگىسىنە كەلەدى، دەپ حابارلايدى «استانا وپەرا» تەاترىنىڭ باسپا ءسوز قىزمەتى.