بۋراباي قازىردىڭ وزىندە قازاقستاننىڭ رامىزىنە اينالدى - ق ر پرەزيدەنتى
«بۋراباي قازىردىڭ وزىندە قازاقستاننىڭ رامىزىنە اينالدى. ەلوردانىڭ قاسىندا ورنالاسقاندىقتان، جاقسى اۆتوماگيسترال بار بولعاندىقتان، سوڭعى ۋاقىتتا تۋريستەر سانى ارتۋدا. جىل بويعى دەمالىس ءۇشىن بارلىق مۇمكىندىكتەر جاسالۋدا. ۆەلوسيپەدپەن جانە جاياۋ سەرۋەن جولدارى اشىلدى، قىستا شانامەن سىرعاناپ، اتقا مىنۋگە، شاڭعى تەبۋگە بولادى. مۇندا ءىرى حالىقارالىق ءىس-شارالار وتكىزۋگە مۇمكىندىكتەر بار.
مىسالعا، شەتەلدىك ينۆەستورلار كەڭەسى بولعاندا بۋرابايدا بارشا الەمنىڭ جەتەكشى بيزنەسمەندەرى باس قوستى. ارينە، ەكسپو-2017 حالىقارالىق كورمەسىنە كەلگەن قوناقتار ءۇشىن دە بۋرابايعا دەيىن باعىت ۇيىمداستىرىلاتىن بولادى. كۋرورتتىق ايماق كوپتەگەن تۋريستەردى تارتادى، باستىسى - ولار ءۇشىن بارلىق قاجەتتى جاعدايلاردى جاساۋ كەرەك»، - دەيدى پرەزيدەنت.
مەملەكەت باسشىسى بۋرابايدا وتكەن ت م د جانە ە ا ە و سامميتتەرىن ەسكە الا وتىرىپ، وعان قاتىسقان مەملەكەتتەردىڭ باسشىلارى مەن ۇكىمەت مۇشەلەرى سول ءىس-شارالار تۋرالى ىلتيپاتپەن ەسكە الاتىنىن اتاپ ءوتتى.
«ينفراقۇرىلىمى دامىعان سايىن بۋرابايدىڭ اتاعى الەمگە تانىلا بەرەتىن بولادى. بيزنەسمەندەردىڭ نازارىن وسىنداي جاعدايلار تۋعىزۋعا جانە دەمالىس ءۇشىن زاماناۋي جاقسى كەشەندەر سالۋعا اۋدارعىم كەلەدى»، - دەدى نۇرسۇلتان نازاربايەۆ.
اۆتور: كەنجەكەي توقتامۇرات قىزى
