قازاقستاندىق نيسسادا بولعان تەراكت پەن ونىڭ سالدارى تۋرالى ايتتى

الماتى. قازاقپارات - قازاقستاندىڭ ءىلياس جۇماشەۆ تەراكت بولعان نيسسانىڭ جاي-كۇيى تۋرالى اڭگىمەلەدى.

ونىڭ ايتۋىنشا، ءى. جۇماشەۆ سارسەنبى كۇنى 13- شىلدەدە دوستارىمەن دەمالۋعا كەلگەن. پويىزبەن 1 كۇنگە يتالياعا بارىپ، نيسساعا قايتىپ كەلگەن.

«تەراكت كەزىندە مەن انگليالىق جاعالاۋعا جاقىن كوشەلەردە ءجۇردىم. پوليتسيانى، جەدەل جاردەم كولىكتەرىن كورىپ قوناق ۇيگە اسىقتىم. مەندە ءبارى دۇرىس، اللاعا شۇكىر. قازىر دە نيسسادامىن، ەرتەڭ كەشكە ءوزىم تۇرىپ جاتقان بارسەلونا قالاسىنا ۇشامىن»، - دەدى ول.

بۇگىن كەشكە نيسسا قالاسىندا امەركالىق ءانشى رياننانىڭ كونسەرتى بولۋى ءتيىس ەدى، ءبىراق جاعدايعا بايلانىستى كونسەرت بولمايدى.

«بۇگىن تاڭعى 10 شاماسىندا كوشەگە شىقپاي تۇرىپ، قالانىڭ جاندانا باستاعانىن بالكوننان تاماشالاپ ەدىم. ادامدار قىدىرىپ ءجۇر، ءدامحانالار اشىلىپ جاتىر. قازىر انگليالىق جاعالاۋدىڭ ءبىر بولىگى جابىق نەمەسە قاراۋىل كۇزەتىندە بولۋى مۇمكىن. ول جاققا قازىر بارۋدىڭ قاجەتى جوق»، - دەپ حابارلادى ءى. جۇماشەۆ.

ەستەرىڭىزگە سالا كەتەيىك، شىلدەنىڭ 14 ءى كۇنى نيسسا جاعالاۋىندا باستيليا قامالىن الۋ كۇنىن تويلاۋ بارىسىندا جۇك كولىگى ادامداردى باسىپ-جانشىپ، كەيىن كولىكتەن جيىلعان جۇرتقا وق اتقان. شابۋىل سالدارىنان 84 ادام قازا تاپتى، ونىڭ ىشىندە بالالار بار، تاعى 18 ءى اۋىر جاراقات الدى، 100 دەن استامى جاراقاتتاندى. فرانسيالىق ب ا ق جۇك كولىگىنەن 31 جاستاعى نيسسا تۇرعىنىنىڭ جەكە كۋالىگىن تاپقانىن، ونىڭ فرانسيامەن قاتار تۋنيس ازاماتى بولعانىن حابارلادى. پوليتسيا جۇك كولىگىنىڭ جۇرگىزۋشىسىن اتىپ تاستادى. كۇش قۇرىلىمدارى ونىڭ سىبايلاستارىنىڭ بولعانىن نە بولماعانىن انىقتاپ جاتىر.