نيسسا قالاسىنداعى تەراكتىنى ەستىگەندە جۇرەگىمىز اۋىردى - نۇرباقىت تەڭىزبايەۆ، بەيجىڭ وليمپياداسىنىڭ جۇلدەگەرى

استانا. قازاقپارات - يسلام ءدىنىن جامىلىپ، بەيكۇنا جانداردى ولتىرگەندەر ەكى دۇنيەدە دە وڭبايدى. بۇل تۋرالى گرەك-ريم كۇرەسىنەن بەيجىڭ وليمپياداسىنىڭ قولا جۇلدەگەرى نۇرباقىت تەڭىزبايەۆ ءمالىم ەتتى.

«نيسسا قالاسىنداعى تەراكتىنى ەستىگەندە جۇرەگىمىز اۋىردى. مەيلى قاي ەلدە، قاي جەردە بولسا دا بىرەۋدىڭ قانىن جازىقسىز توككەندەر ەكى دۇنيەدە دە وڭبايدى. «قۇراندا سەبەپسىز ءبىر ادامدى ولتىرسەڭ، كۇناسى بۇكىل الەمدەگى ادامدى ولتىرگەنمەن بىردەي، ءبىر ادامدى ولىمنەن امان الىپ قالساڭ، ونىڭ ساۋابى بۇكىل ادامدى قۇتقارعانمەن بىردەي» دەپ جازىلعان. قازىر يسلام ءدىنىن جامىلىپ، بەيكۇنا جانداردى قىرۋ، ءولتىرۋ ول - يسلام دىنىنە كىر كەلتىرۋ. يسلام ءدىنى - بەيبىتشىلىككە، دوستىققا، تازالىققا شاقىراتىن ەڭ كەرەمەت ءدىن. سوندىقتان ءدىندى جامىلىپ، باسسىزدىققا بارماۋ كەرەك. نيسساداعى زارداپ شەككەن بەيكۇنا جاندارعا قايعىرىپ كوڭىل ايتامىن»، - دەدى وليمپيادا جۇلدەگەرى.

ەسكە سالا كەتەيىك، شىلدەنىڭ 14 ءى كۇنى نيسسا جاعالاۋىندا باستيليا قامالىن الۋ كۇنىن تويلاۋ بارىسىندا جۇك كولىگى ادامداردى باسىپ-جانشىپ، كەيىن كولىكتەن جيىلعان جۇرتقا وق اتقان. شابۋىل سالدارىنان 84 ادام قازا تاپتى، ونىڭ ىشىندە بالالار بار، تاعى 18 ءى اۋىر جاراقات الدى، 100 دەن استامى جارالى. فرانسيالىق ب ا ق جۇك كولىگىنەن 31 جاستاعى نيسسا تۇرعىنىنىڭ جەكە كۋالىگىن تاپقانىن، ونىڭ فرانسيامەن قاتار، تۋنيس ازاماتى بولعانىن حابارلادى. پوليتسيا جۇك كولىگىنىڭ جۇرگىزۋشىسىن اتىپ تاستادى. كۇش قۇرىلىمدارى ونىڭ سىبايلاستارىن انىقتاپ جاتىر.

اۆتور: كۇنسۇلتان وتارباي