بەرىك ءۋالي بايان-ولگەيدەگى سەلدەن دومبىراسى سىنعان بالاعا جاڭا دومبىرا تارتۋ ەتەدى

استانا. قازاقپارات - «نۇر وتان» پارتياسى ءتوراعاسىنىڭ بىرىنشى ورىنباسارىنىڭ كەڭەسشىسى بەرىك ءۋالي بايان-ولگەيدەگى سەلدەن دومبىراسىن سىندىرىپ العان بۇلدىرشىنگە جاڭا دومبىرا تارتۋ ەتپەك.

بۇل ول تۋرالى ءوزىنىڭ فەيسبۋكتەگى جەكە پاراقشاسىندا ءمالىم ەتتى. وندا: «مىنا بالانى تانىمايمىن. ءبىراق، ول - مەنىڭ باۋىرىم. ويتكەنى، ول - قازاق! ءبۇلدىرشىننىڭ دومبىراسى ءبۇلىنىپتى. ىشەگى ءۇزىلىپ، تيەگى سىنىپتى. ءبىراق، ونىڭ ءۇمىتى ۇزىلگەن جوق. ارمانىنا جەتسىن. ون ساۋساعىنان ونەر تامعان كۇيشى بولسىن دەپ دومبىرا اتادىم وعان. جىگىتتەر جەتكىزىپ بەرەر. باۋىرىم ارمانىڭا جەتكەيسىڭ! بايان-ولگەيدەگى سەلدەن زارداپ شەككەن باۋىرلارىمىزعا كومەگىمىزدى اياماسپىز. دەگەنمەن، وسى سۋرەت كوڭىلىمدى الاي-دۇلەي ەتتى. وسى بالانىڭ اتى-ءجونىن بىلەتىندەر حابارلاسسا ەكەن دەيمىن»، - دەپ جازىلعان پاراقشاسىندا.

اۆتور: كۇنسۇلتان وتارباي