زاتتىبەك ارىپتەستەرىن موڭعوليا قازاقتارىنا كومەكتەسۋگە شاقىردى
بۇل تۋرالى Stan.kz حابارلايدى.
موڭعولياداعى قوبدا وزەنىندەگى سۋ دەڭگەيى كوتەرىلىپ، 100 دەن استام ءۇيدى اعىزىپ اكەتكەن بولاتىن. كۋاگەرلەر تابيعي اپات سالدارىنان ءتورت جاسار ءبۇلدىرشىن مەن ەرەسەك ادامنىڭ كوز جۇمعانىن ايتقان. مۇنىمەن قاتار، 700 دەن استام ادام باسپاناسىز قالعان. ولاردىڭ بارلىعى دەرلىك ەتنيكالىق قازاقتار.
قايعىلى حاباردى ەستىگەن جۇلدىز قاۋىمى دا ولارعا كومەك كورسەتۋگە تىرىسقان- دى. العاشقىلاردىڭ ءبىرى ءانشى زاتتىبەك كوپبوسىنوۆ بولدى.
«ءار قازاق مەنىڭ جالعىزىم» دەگەن ءسوز ەلدىڭ قامىنا بەي- جاي قارامايتىن كەز- كەلگەن ازاماتتىڭ ۇرانى. بۇل ءسوزدى تۇعىرىنا اينالدىرعان جاندار ەلىمىزدە بارشىلىق. باسى اۋىرىپ بالتىرى سىزداعان ءار قازاققا قول ۇشىن بەرەتىندەر مەنىڭ اينالامدا كوپ، شۇكىر. دوس- باۋىرلارىمنىڭ كوپتەگەن يگى ءىسىنىڭ كۋاسى دە بولىپ ءجۇرمىن. بۇرىندارى جاۋ شاپقاندا اتقا مىنە الاتىنداردىڭ بارلىعى ەگەۋلى نايزاسىن قولعا الىپ ەلدى قورعاۋ، قازاقتى ساقتاۋ مىندەتىن اتقارعانىن تاريحتان بىلەمىز.
بابالارىمىز جۇمىلعان جۇدىرىقتاي بولىپ، بىرىگە، بىرلەسە ىستەگەن ىستەرىنىڭ ەشقايسىسى دا جەمىسسىز بولماعان. مۇنى ايتىپ وتىرعان سەبەبىم، بەيبىت زاماندا دا بىرىگىپ، ءار قازاقتى ساقتاۋ اماناتىن ارقالايتىن كۇن دە تۋادى ەكەن. سول ءسات كەلگەن سياقتى.
كەشە عانا موڭعولياداعى سۋ تاسقىنىنان زارداپ شەككەن قانداستاردىڭ جاعدايىنان بارلىعىڭىز حاباردارسىزدار دەپ ويلايمىن. تاۋەلسىز قازاقستاننىڭ ازاماتتارى شاماسى كەلگەنشە قول ۇشىن بەرىپ، قانداستاردىڭ الدىنداعى باۋىرلىق مىندەتتى اتقارىپ جاتىر ەكەن.
بيلىكتەگىلەر دە بۇل جاعدايعا الاڭداپ، اماندىقتارىن سۇراۋعا بەل بايلاپتى. ءتيىستى دەڭگەيدە كومەك تە كورسەتىلەدى دەپ جاتىر. مەنىڭ دە وسى يگى ىستەردەن قۇر قالعىم كەلمەيدى. سۋ باسقان اۋىلداعى قانداستارعا وتباسىمنىڭ اتىنان قارجى اۋدارامىن دەپ شەشتىم.
بالكىم سول قارجىنىڭ سەبەبىمەن سونداعى ءبىر قازاعىمىزدىڭ وتباسى كيىمىن، ءبىر قازاعىمىز ازىق- تۇلىگىن السا، ەندى ءبىرى بۇزىلعان كولىگىن اۋىستىرار. مۇنى ماقتانۋ ءۇشىن ەمەس، ءوز تىڭدارماندارىما وي سالۋ ءۇشىن جازىپ وتىرمىن! بابالارىمىز «بارماق بىرىكپەي، ينە ىلىكپەيدى" دەمەي مە؟ ! اللا قيىندىققا تۇسكەن قانداستىرىمىزعا جەڭىلدىگىن بەرسىن!» - دەيدى زاتتىبەك كوپبوسىنوۆ.
ءانشىنىڭ بۇل "باستاماسىن" جەلى قولدانۋشىلارى دا قولدادى. ال ارىپتەستەرى جوعارىداعى جازباسىن بولىسۋگە اسىقتى.
