ەرلىگى ءۇشىن ەلباسىنىڭ قولىنان مەدال العان جول ساقشىسى - فوتو

استانا. قازاقپارات - توعىز جولدىڭ تورابىندا ورنالاسقان استانانىڭ حالىقارالىق دارەجەدەگى نەگىزگى كولىك حابتارىنىڭ بىرىنە اينالۋعا تولىق مۇمكىندىگى بار.

بۇگىننىڭ وزىندە قالاعا التى باعىتتان تاۋلىگىنە 74 مىڭعا جۋىق كولىك كىرەدى ەكەن. الايدا، ەڭ ماڭىزدى ماسەلە - قالاداعى قاۋىپسىزدىكتى ساقتاۋ. ەلوردانىڭ 6 باقىلاۋ بەكەتىندە پوليتسيا قىزمەتكەرلەرى كۇندىز-ءتۇنى قالا تىنىشتىعىن كۇزەتۋدە. وسى ورايدا BNews.kz ءتىلشىسى استانا قالاسى ءى ى د اكىمشىلىك پوليتسيا باسقارماسى ج پ پ پولكىنىڭ اعا سەرجانتى باعلان قارىمبايەۆپەن تىلدەستى.

بۇگىندە استانا - قاراعاندى تاسجولىندا ورنالاسقان «دۋمان» ستاتسيونارلىق باقىلاۋ بەكەتىندە تاۋلىك بويى ءتارتىپ ساقشىلارى ءوز مىندەتىن اتقارۋدا.

«ءبىر تاۋلىكتە اتالمىش باقىلاۋ بەكەتىندە جىلدام ارەكەت ەتەتىن ارنايى جاساق وكىلدەرى، جول-پاترۋلدىك قىزمەتىنەن 3، كوشى-قون قىزمەتى مەن كينولوگيادان 1 مامان، جالپى 7 ادام جۇمىس ىستەيدى. كەيىن ءبىزدى باسقا ماماندار اۋىستىرادى. اقتوبە وقيعاسىنان كەيىن كۇشەيتىلگەن رەجيمدە جۇمىس ىستەپ جاتىرمىز. قالاعا كىرىپ-شىعاتىن كولىكتەر وتە كوپ. قىلمىستىق ءىس-ارەكەتتەرگە جول بەرمەۋ كەرەك»، - دەيدى اعا-سەرجانت.

پوليتسيا قىزمەتكەرىنىڭ ايتۋىنشا، استانادا ورنالاسقان 6 ستاتسيونارلىق باقىلاۋ بەكەتى بيىل قالاعا زاڭسىز قارۋ-جاراق، ەسىرتكى زاتتارىن كىرگىزبەك بولعان 600 دەرەكتى انىقتاعان. سونىمەن قاتار، پوليتسيا قىزمەتكەرلەرى ەلىمىزدە ءسىبىر جاراسى اۋرۋىنا كارانتين جاريالانۋىنا بايلانىستى قالاعا ەت ونىمدەرىن تاسىمالدايتىن كولىكتەردى قىراعى تەكسەرۋگە كوشكەن.

«ەلوردادا 6 باقىلاۋ بەكەتى بار. وسى بەكەتتەردە جىل باسىنان بەرى زاڭسىز تاۋار اكەلۋگە قاتىستى 600 دەرەك تىركەلدى. ونىڭ ىشىندە زاڭسىز قارۋ-جاراقپەن، ەسىرتكى زاتتارىمەن ۇستالعان ازاماتتار بار. سونداي-اق، قازىرگى تاڭدا ەلىمىزدە ءسىبىر جاراسى اۋرۋىنا كارانتين جاريالانىپ وتىر. سوندىقتان قالاعا ەت ونىمدەرىن كىرگىزۋگە تىيىم سالىندى. وسى ورايدا جەڭىل، اۋىر كولىكتەردى قاتاڭ تۇردە تەكسەرىستەن وتكىزىپ جاتىرمىز. ەگەر ماشينالاردان ەت ونىمدەرى انىقتالسا، ق ر اۋىل شارۋاشىلىعى مينيسترلىگىنىڭ ماماندارىن شاقىرامىز. ولار ساراپتامالىق جۇمىستى جۇرگىزەدى. مۇنىڭ بارلىعى قاۋىپسىزدىك ءۇشىن جاسالۋدا»، - دەدى ول.

باعلان قارىمبايەۆ ومىرىنە تونگەن قاۋىپكە قاراماستان ىزدەۋدە جۇرگەن قىلمىسكەردى ۇستاعان. وقيعا 2015-جىلدىڭ 6- قاراشاسىندا استانا قالاسىنداعى گەتە كوشەسىندە بولدى. اراققا سىلقيا تويىپ العان «Lada Kalina»ماركالى اۆتوموبيلدى تىزگىندەگەن جۇرگىزۋشى جول ەرەجەسىن ورەسكەل بۇزعان. باعلان كولىكتى توقتاتىپ، قۇجاتتاردى تەكسەرمەك بولعان ساتتە كولىك يەسى ءىزىن سۋىتپاق بولادى.

الايدا، پوليتسيا اعا سەرجانتى ورنىنان قوزعالعان كولىكتىڭ رولىنە جارماسىپ، بۇزاقىنى توقتاتۋعا اركەت جاساعان. جۇرگىزۋشى جىلدامدىقتى شەكتەن تىس اسىرىپ، پوليتسەيدى سۇيرەتىپ كەلەسى كوشە قيىلىسىنا دەيىن جەتكەن. دەنە جاراقاتتارىن العانىنا قاراماستان، باعلان زاڭ بۇزۋشىنى قۇرىقتايدى.

«مەن قىلمىسكەردى توقتاتپاسام، باسقا ازاماتتار جاپا شەگۋشى ەدى. ونىڭ ۇستىنە بۇل قىزمەتتىك مىندەتىمە كىرەتىندىكتەن، قالاي بولسا دا توقتاتۋىم قاجەت بولدى. باسقا ازاماتتار زارداپ شەكپەۋى قاجەت. سونداي-اق، ۆوكزال اۋماعىندا جاياۋ جۇرگىنشىلەر كوپ بولاتىن. وسى ازاماتتارعا اۆتوكولىك يەسىنىڭ زيانى ءتيىپ كەتۋشى ەدى. سوندىقتان باتىل ارەكەت ەتۋگە تۋرا كەلدى. كەيىن مەن ونىڭ بۇرىن سوتتالعانىن جانە قىزىلوردا وبلىسىندا قىلمىس جاساعانى ءۇشىن ىزدەۋدە جۇرگەنىن ءبىلدىم. 3 اپتا اۋرۋحانادا جاتتىم. اياعىمنىڭ سىڭىرلەرى سوزىلعان ەكەن. جازىلعان سوڭ جۇمىسقا قايتادان كىرىستىم»، - دەدى ول.

باعلاننىڭ باتىل ارەكەتى ەسكەرۋسىز قالعان جوق. ول ق ر ىشكى ىستەر ءمينيسترى قالمۇحامەد قاسىموۆتان العىس حات پەن «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىن الدى. كەيىن ءتارتىپ ساقشىسىن مەملەكەت باسشىسى نۇرسۇلتان نازاربايەۆتىڭ ءوزى «ەرلىگى ءۇشىن» مەدالىمەن ماراپاتتادى.

بۇگىندە پوليتسيا قىزمەتكەرى وزىنە جۇكتەلگەن مىندەتتى ابىرويمەن اتقارىپ ءجۇر. ول ءالى دە تالاي بەلەستەردى باعىندىرۋدى كوزدەيدى. الداعى ماقساتى - ءوزىنىڭ كاسىبي بىلىكتىلىگىن ودان ءارى شىڭداي ءتۇسۋ. ءارى باعلان قيىن دا كۇردەلى ماماندىقتى تاڭداعانىنا ەش وكىنبەيدى ەكەن.

«سەبەبى، بۇل ماماندىقتى سانالى تۇردە تاڭدادىم. بالا كۇنگى ارمانىم ەدى. ەگەر ماماندىققا قورقىنىش پەن ۇرەي ارقىلى كەلسەڭ، ەشقانداي ناتيجەگە قول جەتكىزە المايسىڭ. بولاشاق ماماندىقتى جۇرەكپەن تاڭداۋ قاجەت دەپ ويلايمىن. بالا كۇنىمدە باۋىرجان مومىش ۇلىنا قاراپ، ەلىكتەپ ءوستىم. وسى سالاعا كەلۋىمە باۋىرجان اتامىزدىڭ ىقپالى بولدى دەپ ايتا الامىن. ول -  حالىق قاھارمانى اتاعىنا لايىقتى ازامات. الدا تالاي جوسپار بار. ءبىراق، ماڭىزدىسى -  حالقىمىزعا ادال قىزمەت ەتۋ»، - دەدى ب. قارىمبايەۆ.