اقمولا وبلىسىنىڭ اكىمى ازاماتتاردى جەكە ماسەلەلەرى بويىنشا قابىلدادى

استانا. قازاقپارات - اقمولا وبلىسىنىڭ اكىمى سەرگەي كۋلاگين ازاماتتاردى جەكە ماسەلەلەرى بويىنشا قابىلدادى.

ماسەلەلەردىڭ دەنى جۇمىسپەن قامتۋ، ءبىلىم جانە كوممۋنالدىق سالالاردى قامتىدى، دەپ حابارلايدى وبلىس اكىمىنىڭ باسپا ءسوز قىزمەتى.

كوكشەتاۋ قالاسىنىڭ تۇرعىنى گ. تاسبولاتوۆا ءوڭىر باسشىسىنان كوللەدج باسشىسى بوس لاۋازىمىنا جۇمىسقا ورنالاسۋعا كومەك سۇراي كەلىپتى. شاعىمدانۋشى وسى ماسەلە بويىنشا اقمولا وبلىستىق ءبىلىم باسقارماسى باسشىسىنىڭ قابىلداۋىنا شاقىرىلعان. ءبىراق بەلگىلەنگەن كۇنى بارا الماعان. ەندى بۇل ماسەلەگە وبلىس اكىمىنىڭ ارالاسۋىن سۇرايدى. اكىم جۇمىسقا ورنالاسۋدىڭ ءوز ءتارتىبى بارىن جانە ول زاڭدى تۇردە جۇزەگە اسىرىلۋى قاجەت ەكەندىگىن جەتكىزدى. وعان قوسا وبلىستىق ءبىلىم باسقارماسىنىڭ مالىمەتى بويىنشا ءدال بۇگىنگى كۇنى ايماقتىڭ كوللەدجدەرىندە باسشىلىق بوس ورىن بولماي شىقتى. ءوڭىر باسشىسى گۇلنار تۇرلىبەك قىزىنا بولاشاقتا ءبىلىم باسقارماسىمەن تىعىز بايلانىس ورناتۋ تۋرالى كەڭەس بەردى.

ال ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ورىس فيلولوگياسى جانە كىتاپحانا ىسى كافەدراسىنىڭ مەڭگەرۋشىسى گۇلنار فاتكيەۆا «ورىس ءتىلى مەن ادەبيەتى» ماماندىعى بويىنشا تۇلەكتەرگە وبلىس اكىمىنىڭ گرانتىن ءبولۋ ماسەلەسىن كوتەرە كەلگەن ەكەن.

گۇلنار تاگير قىزىنىڭ ايتۋىنشا كافەدرا جۇرگىزگەن ساراپتاما بويىنشا اتالمىش وقۋ ورنىندا جىل سايىن «ورىس ءتىلى مەن ادەبيەتى» ماماندىعى بويىنشا ءبىتىرۋشى ستۋدەنتتەر سانى ازايۋدا، ال وقىعىسى كەلەتىندەردىڭ وقۋ باعاسىن تولەۋ مۇمكىندىكتەرى جوق. بيىل اتالمىش بولىمگە 12 تۇلەك قۇجات تاپسىرىپتى. ولار ەندى مەملەكەتتىك گرانتتىڭ ءبولىنۋىن كۇتۋدە. مەملەكەتتىك تاپسىرىس بويىنشا گرانت جىل سايىن تەك 3-4 ستۋدەنتكە عانا بولىنەدى. ال قالعاندارى ءوز جەكە قاراجاتتارىنا وقۋعا ءتيىستى.

وقۋ قۇنى شامامەن 430 مىڭ تەڭگەنى قۇرايدى. بۇگىنگى كۇنگى قۇجات تاپسىرعان تۇلەكتەردىڭ بىرنەشەۋىنە ءوڭىر باسشىسىنىڭ گرانتىن نەمەسە جەكە شاكىرتاقىسىن تاعايىنداۋ ماسەلەسى شەشىلسە نۇر ۇستىنە نۇر بولار ەدى. ويتپەگەن جاعدايدا بولاشاقتا وسى سالا بويىنشا وڭىردە ماماندار جەتىسپەۋشىلىگى قاتتى سەزىلەتىن بولادى»، - دەدى گۇلنار فاتكيەۆا.

ءوڭىر باسشىسى بۇل ماسەلەنىڭ باقىلاۋدا بولاتىنىن ايتا كەلە، اقمولا وبلىستىق جاستار ساياساتى ماسەلەسى بويىنشا باسقارماسىنىڭ باسشىسى ر. گاللياموۆقا بۇل سۇراقتى تەزىرەك شەشۋدى اتاپ ايتقاندا وبلىس اكىمىنىڭ بىرنەشە گرانتىن ءبولۋ جانە جەكە دەمەۋشىلەردى تارتۋ مۇمكىنشىلىگىن قاراستىرۋدى تاپسىردى.

سونداي-اق وسى كۇنى وبلىس اكىمى كراسنىي يار سەلوسىنىڭ تۇرعىنى سەرگەي نيجنيك پەن استانالىق «BII tech service» ج ش س وكىلدەرىن قابىلدادى.

سەرگەي لەونتيەۆيچ ءوزىنىڭ ۇيىنە ينجەنەرلىك كوممۋنيكاتسيا جۇرگىزۋ ماسەلەسىن كوتەرسە، سوڭعىلارى ءوڭىر باسشىسىنا اقمولا وبلىسىنىڭ اۋماعىنداعى ماگيسترالدىق قۇبىرلاردى جوندەۋ بارىسىندا پايدالانۋعا بولاتىن زاماناۋي ماتەريالداردىڭ جوباسىن ۇسىندى.

جالپى كەزدەسۋ قورىتىندىسى بويىنشا بارلىق كەلۋشىلەردىڭ وتىنىشتەرى بويىنشا ءتيىستى سالا باسشىلارىنا ناقتى تاپسىرمالار بەرىلدى.