التى ءتىل بىلەتىن قازاق قىزى وزىنەن ون جاس كىشى ۇندىلىككە تۇرمىسقا شىقتى
استانا. قازاقپارات - التى ءتىل بىلەتىن قازاق قىزى ۇندىلىككە تۇرمىسقا شىقتى. بويجەتكەن وزىنەن ون جاس كىشى ۇندىلىك ازاماتقا تۇرمىسقا شىقسا دا، باقىتتى ەكەنىن ايتۋدا. بۇل تۋرالى hindustantimes.com سايتىنا سىلتەمە جاساپ NUR. KZ پورتالى حابارلايدى.
34 جاستاعى جاننا شالابايەۆا 24 جاستاعى تينۋ دجانگراعا (Teenu Jangra) ەكىنشى ماۋسىم كۇنى تۇرمىسقا شىققان. ەندىگى جاس جۇبايلار ۆيزا ماسەلەسىن شەشە الماي جۇرگەن كورىنەدى. سەبەبى، جاننانىڭ تۋريستىك ۆيزاسى 2016 -جىلدىڭ ءبىرىنشى تامىزىندا بىتەدى.
جاننا سۇيىكتىسىن ساۋد ارابياسىندا جولىقتىرعان. تينۋ ول جەردە بالقىتۋشى بولىپ قىزمەت ەتكەن. ال جاننا ءبىلىم الىپ جۇرگەن. ەكەۋىنىڭ اراسىندا ماحاببات ۇشقىنى تۋىنداپ، جاستار نەكەسىن قيۋعا بەل بۋادى.
29 - مامىر كۇنى جاننا ءۇندىستانعا كەلىپ، تينۋمەن توحانا عيباداتحاناسىندا نەكەسىن قيادى. نەكە قيۋ ءراسىمى ۇندىلىك جورالارعا ساي وتكەن.
"ۇندىلىك توي وتكەننەن كەيىن ءبىز ءبىرىنشى كەزەكتە ۆيزانى ۇزارتۋ ماسەلەسىن شەشۋگە كىرىستىك"، - دەيدى جاننا.
جاس جۇبايلاردىڭ ۆيزانى ۇزارتۋدا قيىندىقتارعا تاپ بولعانى جەرگىلىكتى باسىلىمنىڭ نازارىنا ىلىگەدى. توعىزىنشى شىلدە كۇنى جاريا ەتىلگەن ماقالانى ەلدىڭ وداق ءمينيسترى بايقاپ قالعان. ول ۆيزا ماسەلەسىن تاياۋ ارادا شەشەتىنىن مالىمدەپ، ءوز تۆيتتەر پاراقشاسىندا جازبا قالدىرىپتى.
جاننا جاڭا وتباسىندا باقىتتى ەكەنىن ايتۋدا.
"مەن وسىندا ەكەنىمە باقىتتىمىن. كۇيەۋىم مەن ونىڭ جاقىندارى ماعان تۇسىنىستىكپەن قارايدى. مەنىڭ جولىم بولدى"، - دەيدى جاننا.
ال تينۋ بولسا، التى ءتىل بىلەتىن كوزى اشىق قىزعا ۇيلەنگەنىنە قۋانىشتى. ول تاياۋ ارادا جاننا ءۇندى ءتىلىن دە ۇيرەنىپ الادى دەگەن ۇمىتتە.
"ول انا تىلىنەن بولەك التى ءتىل بىلەدى، اعىلشىن، فرانسۋز، پارسى تىلدەرىن قوسقاندا. مەن كۇندەردىڭ ءبىر كۇنىندە ول ءۇندى ءتىلىن دە ۇيرەنىپ الادى دەگەن ۇمىتتەمىن"، - دەيدى تينۋ.
