قازاقستاننىڭ ەت ەكسپورتىنا قاۋىپ ءتونىپ تۇر
سالدارىنان قازاقستاندىق كاسىپكەرلەر ءۇش ميلليارد تەڭگەگە جۋىق تابىسىنان قاعىلدى.
بۇل تۋرالى بۇگىن «قازاقستاننىڭ ەت وداعى» بىرلەستىگىنىڭ ءتوراعاسى ماقسۇت باقتىبايەۆ كەزەكتەن تىس سەزدە ءمالىم ەتتى.
ونىڭ ايتۋىنشا، اعىمداعى جىلدىڭ مامىر ايىنان بەرى اقتوبە، اتىراۋ جانە قاراعاندى وبلىستارىنداعى مالدىڭ پاستەرەللەزدەن قىرىلۋ سالدارىنان رەسەي تاراپى ەلىمىزدەن اكەلىنەتىن ەت پەن ەت ونىمدەرىنە شەكتەۋ سالعان. بۇنداي شەكتەۋدەن وتاندىق ەكسپورتتۋشىلار 3 ميلليارد تەڭگەگە جۋىق ىقتيمال تابىسىنان ايىرىلىپ وتىر. بۇدان بولەك، قاراعاندى جانە پاۆلودار وبلىستارىنداعى ءسىبىر جاراسىنا قاتىستى فاكتىلەر جاعدايدى ۋشىقتىرا ءتۇسىپتى.
«قازاقستاننىڭ اۋىل شارۋاشىلىعىنداعى جايىلىمدار، مال باسىنىڭ وسىمىنە قاتىستى باسىمدىقتارى ەسكەرىلە كەلە، جاقىن ارالىقتا رەسەي مەن قىتايعا ميللياردتاعان دوللار ونىمدەر ەكسپورتتالادى دەپ جوسپارلانعان. ءىرى قارا مال باسىن اسىلداندىرۋ، وسى باعىتتاعى ەكسپورتتىق الەۋەتتى ارتتىرۋ قولعا الىندى. «سىباعا» باعدارلاماسى ارقىلى 12 مىڭعا تارتا ۇساق جانە شاعىن شارۋاشىلىقتار جەڭىلدەتىلگەن سۋبسيديالار الىپ، مال باسىن ءوسىردى. الايدا، اعىمداعى وقيعالار جاعدايدى ۋشىقتىرىپ جىبەردى. ءبىز وسىنى ەسكەرە كەلە، مەملەكەتتەن ۆەتەرينارلىق باقىلاۋدى كۇشەيتۋدى سۇرايمىز»، - دەدى وداق باسشىسى م. باقتىبايەۆ.
بۇل رەتتە قازاقستاننىڭ ەت وداعى جايىلىمداعى مالدى باقىلاۋدىڭ اۆتوماتتاندىرىلعان جۇيەسىن ەنگىزۋدى ۇسىنادى. سونىمەن قاتار، جەرگىلىكتى اتقارۋشى ورگانداردىڭ بازارلارداعى ۆەتەرينارلىق باقىلاۋعا، مال سويۋ الاڭدارىن تەكسەرۋگە قاتىستى ەرەجەنى ساقتاۋ بويىنشا جاۋاپكەرشىلىگىن ارتتىرۋ ۇسىنىلادى.
«قازاقستاننىڭ ىشكى نارىعى 100 پايىزعا ەتپەن قامتاماسىز ەتىلگەن. سوندىقتان دا ەكسپورتتىق الەۋەتتى ارتتىرۋ ءۇشىن ءبىز «سىباعا» ارقىلى قاراجات قۇيا باستادىق. ەندەشە، ءبىزدىڭ قاراجاتتىڭ قايتارىلىمى دا وسى ەكسپورتتىڭ جاندانۋىنا تىكەلەي بايلانىستى. ەگەر ەكسپورت بولماي، نارىق شىعىندى بولسا، ءبىزدىڭ كاسىپورىندارىمىز دا قارىزعا باتادى، تولەم قابىلەتتىلىگى تومەندەيدى. سوندىقتان دا مەملەكەت ەكسپورتتىڭ اشىلۋىنا باسا نازار اۋدارسا يگى. ويتكەنى، قازاقستاندىق ەت پەن ەت ونىمدەرىنە رەسەي، قىتاي، يران جانە پارسى شىعاناعىنىڭ ۇلكەن سۇرانىسى ءوسىپ كەلەدى»، - دەدى م. باقتىبايەۆ.
