ريو وليمپياداسىنىڭ ءۇمىتى: قولعاپ كيگەن قازاقتىڭ قوس ارۋى
تورتكۇل دۇنيەنىڭ كىل مىقتىلارى باق سىنايتىن ءدۇبىرلى دودادا قازاقتىڭ ەكى بىردەي قاراكوز بوكسشى قىزى ەل نامىسىن قورعايتىن بولادى.
وسىدان ءتورت جىل بۇرىن، ياعني لوندون وليمپياداسىنان باستاپ حالىقارالىق وليمپيادالىق كوميتەتى قىزدارعا دا وليمپيادا ويىندارىنا قاتىسۋعا مۇمكىندىك بەرگەن بولاتىن.
لوندوندا قازاق ەلىنىڭ نامىسىن ەكى ارۋىمىز سايدا حاسەنوۆا مەن مارينا ۆولنوۆا قورعاپ، بىرەۋى وليمپيادانىڭ قول مەدالىن جەڭىپ العانى ءالى ەسىمىزدە. مىنە، اراعا ءتورت جىل سالىپ تاعى ەكى ارۋىمىز ريو-دە-جانەيرو وليمپياداسىنا قاتىسۋ مۇمكىندىگىنە قول جەتكىزدى.
جاقىندا استانادا بوكستان ايەلدەر اراسىندا وتكەن الەم چەمپيوناتىندا جەرلەستەرىمىز قورجىنىمىزعا ءتورت التىن سالىپ، جالپى كوماندالىق ەسەپتە الەم ەلدەرىنىڭ كوشىن باستاعان بولاتىن. سوندىقتان، ريودا بوكسشى ازاماتتارىمىزدان قانداي جۇلدە كۇتسەك، بوكسشى قىزدارىمىزدان دا سونداي جۇلدە كۇتەمىز. ارۋلارىمىز دا جۇلدەگە لايىقتى دەپ سەنىممەن ايتۋعا بولادى.
جاينا شەكەربەكوۆا
تۋعان كۇنى/جىلى: 17.12.1989
تۋعان جەرى: و ق و
سالماعى: 51 كەلى
باپكەرى: ۆ. نەچاي
جەتىستىكتەرى:
ازيا چەمپيونى (2010)؛
قازاقستان چەمپيونى (2013)؛
قازاقستان چەمپيونى (2014)؛
ازيا چەمپيوناتىنىڭ كۇمىس جۇلدەگەرى (2014)؛
ق ر سپارتاكياداسىنىڭ جەڭىمپازى (2015)؛
الەم چەمپيوناتىنىڭ قولا جۇلدەگەرى (2016)؛
حالىقارالىق دارەجەدەگى سپورت شەبەرى. وليمپيادا ويىندارىنا جولداماعا استانادا وتكەن قىزدار اراسىنداعى الەم چەمپيوناتىندا قول جەتكىزدى. وليمپيادا ويىندارىنا تۇڭعىش رەت قاتىسقالى وتىر.
داريعا شاكىموۆا
تۋعان كۇنى/جىلى: 20.11.1988
تۋعان جەرى: پەتروپاۆل ق.
سالماعى: 75 كەلى
باپكەرى: ۆ. پريسياجنيۋك
جەتىستىكتەرى:
ازيا چەمپيونى (2010)؛
قازاقستان چەمپيونى (2013)؛
قازاقستان چەمپيونى (2014)؛
ازيا چەمپيونى (2015)؛
قازاقستان چەمپيونى (2016)؛
حالىقارالىق دارەجەدەگى سپورت شەبەرى. شاكىموۆا وليمپيادا ويىندارىنا جولدامانى قىتايدا وتكەن بوكستان ازيا جانە مۇحيت ايماعى ەلدەرى بويىنشا وليمپيادا ويىندارىنا جولداما ساراپقا سالىنعان تۋرنيردە جەڭىپ الدى. وليمپيادا ويىندارىنا تۇڭعىش رەت قاتىسقالى وتىر.
وسى جەردەن ءسال شەگىنىس جاساپ، قازاق سپورتىنىڭ تاريحىنا قىسقاشا كوز جۇگىرتىپ قارايتىن بولساڭىز، ءالى كۇنگە وليمپيادا چەمپيونى، ءتىپتى جۇلدەگەرى بولعان قازاق قىزى جوق. تاۋەلسىزدىگىمىزدى العان سوناۋ جىلداردان قازىرگە دەيىنگى وتكەن قىسقى جانە جازعى وليمپيادا ويىندارىندا ءالى بىردە-ءبىر قازاق قىزى جۇلدەگە ىلىنە الماي كەلەدى.
وسىدان التى جىل بۇرىن ياعني، 2010-جىلى تۇڭعىش رەت سينگاپۋردە وتكەن جاسوسپىرىمدەر اراسىنداعى وليمپيادا ويىندارىندا اۋىر اتلەت ارۋىمىز جازيرا جاپپارقۇل جەڭىس تۇعىرىنىڭ ەڭ بيىك ساتىسىنا كوتەرىلىپ، وليمپيادا چەمپيونى اتاندى. ءبىراق، بۇل - جاس جەتكىنشەكتەر اراسىنداعى وليمپيادا ويىندارى ەدى...
ال جەتكىنشەكتەر اراسىنداعى ەمەس، كادىمگى ەرەسەكتەر اراسىنداعى ءتورت جىلدا ساعىندىرىپ ءبىر جەتەتىن جازعى جانە قىسقى وليمپيادا ويىندارىنا قاتىسىپ جۇرگەن ارۋلارىمىز جوق ەمەس، بار. اق وليمپياداعا قاتىسقان قىزدارىمىز اراسىندا ءبىرىنشى كەزەكتە كونكيشى ارۋىمىز كەنجەش سارسەكەنوۆانى اتاپ وتۋگە ءتيىسپىز. ول 1994-جىلى ليللەحاممەردەگى (نورۆەگيا) ، 1998-جىلى ناگانوداعى (جاپونيا) وليمپيادا ويىندارىنا قاتىسقان. ودان كەيىن دە وليمپيادا ويىندارىنا قاتىسقان قىزدارىمىز بارشىلىق. شايبالى حوككەيدەن دينارا ديقانبايەۆا سولت-لەيك-سيتيدە، فريستايلدان جىبەك اراپبايەۆا ۆانكۋۆەردە ەل نامىسىن قورعادى. سوچي وليمپياداسىندا فريستايلدىڭ اكروباتيكا تۇرىنەن شىمكەنتتىك جانبوتا الدابەرگەنوۆا قازاق قىزدارىنىڭ ىشىنەن تۇڭعىش بولىپ قىسقى وليمپيادادا التىنشى ورىندى يەلەندى. وسىعان دەيىن قازاق ۇلتىنان شىققان بىردە-ءبىر نازىك جاندى سپورتشى اق وليمپيادادا وسىنداي جوعارى ورىن يەلەنىپ كورمەگەن.
ال جازعى وليمپيادا ويىندارىنا قاتىسقان قازاق قىزدارى ءبىرشاما. سولاردىڭ ىشىندە وليمپيادا جۇلدەگەرى اتانۋدان مۇمكىندىكتەرى مول بولعان كوركەم گيمناسشى ءاليا ءجۇسىپوۆا مەن قۇرالايدى كوزگە اتقان مەرگەن زاۋرەش بايبوسىنوۆانى ەرەكشە اتاپ وتۋگە بولادى. ءاليا ءجۇسىپوۆا بەيجىڭ وليمپياداسىندا جۇلدەلى ورىنعا سىنىق سۇيەم جەتپەي قالعان ەدى.
الايدا ازىرشە قازاق قىزدارىنىڭ ءتورت جىلدا ءبىر وتەتىن ءدۇبىرلى دودادا باعى جانباي كەلەدى. ءبىراق ءبىز بيىلعى ХХХІ وليمپيادا ويىندارىندا قازاقتىڭ قاراكوز قىزدارىنىڭ ىشىنەن بىرەۋى جارق ەتىپ شىعىپ، ابىرويىمىزدى اسىرىپ، ءانۇرانىمىزدى اسقاقتاتىپ قايتادى دەگەن سەنىمدەمىز.
اۆتور: كۇنسۇلتان وتارباي
