ۇ ق ك: بەلشەسىنەن قارىزعا باتقان ت. تولەشەۆ مەملەكەتتىڭ اكىمشىلىك رەسۋرسىن يەلەنۋگە ارەكەتتەنگەن

استانا. قازاقپارات - بۇرىنعى بيزنەسمەن توقتار تولەشەۆ ەكىنشى دەڭگەيلى بانكتەر مەن ترانس ۇلتتى قىلمىستىق توپتاردىڭ الدىندا بەلشەسىنەن قارىزعا باتقانى انىقتالدى. بۇل تۋرالى بۇگىن ۇلتتىق قاۋىپسىزدىك كوميتەتى باسپا ءسوز قىزمەتىنىڭ وكىلى رۋسلان قاراسيەۆ ءمالىم ەتتى.

«قولدا بار دايەكتەرگە سۇيەنسەك، ت. تولەشەۆ ءوزىنىڭ قىلمىستىق توبىن «اسىراۋ» ءۇشىن وتە كوپ قارجى جۇمساعان. اينالاسىنا ايتقانىن جۇرگىزىپ ءومىر ءسۇرۋدى ارمانداعان ت. تولەشەۆ بەلشەسىنەن قارىزعا باتقان. ول ق ر ەكىنشى دەڭگەيلى بانكتەرى مەن ترانس ۇلتتىق قىلمىستىق توپتاردىڭ الدىندا دا قارىز بولعان. تولەشەۆتىڭ بارلىق قارىزىن قوسساق 200 ميلليون ا ق ش دوللارىن قۇرايدى»، - دەپ حابارلادى ر. قاراسيەۆ.

ر. قاراسيەۆتىڭ ايتۋىنشا، ءدال وسى ساتتە تولەشەۆتىڭ ويىنا بيلىكتى كۇشپەن باسىپ الۋ يدەياسى كەلەدى. ت. تولەشەۆ وسى جوسپارى ءساتتى ىسكە اسسا، ءوز باقىلاۋىنا وتەتىن اكىمشىلىك رەسۋرس ارقىلى قارىزىنان قۇتىلىپ، وتباسى مەن بيزنەسىنىڭ شالقىعان ءومىرىن قايتارىپ الۋدى كوزدەگەن.

«وسىلايشا، ت. تولەشەۆتىڭ مەملەكەتتىڭ قارجىسىن ءوز قولىما السام دەگەن ويى بيلىكتى كۇشپەن باسىپ الۋعا يتەرمەلەگەن»، - دەپ ءتۇسىندىردى ر. قاراسيەۆ.