كاسپي بەكىرەسىنە ەلەكتروندى ءتول قۇجات بەرىلدى

استانا. قازاقپارات - اتىراۋ وڭىرىندە بەكىرە بالىقتارىنىڭ تۇقىمدىق قورى جاساقتالا باستادى، دەپ حابارلايدى «حابار» تەلەارناسى.

بۇل - بالىق ءوسىرۋ زاۋىتتارىنىڭ جوسپارلى جۇمىس ىستەۋىنە يگى ىقپال ەتەدى. قولدا باعىلىپ، ءتول قۇجات العان بەكىرە، قورتپا، شوقىر مەن سۇيرىك بالىقتارىنان ەندى قاجەتىنشە تۇقىم الۋعا مۇمكىندىك بار.

بۇل جولى جايىق-اتىراۋ بەكىرە بالىعىن ءوسىرۋ زاۋىتىنداعى بەكىرە تۇقىمداستارىنا جاتاتىن شوقىر بالىعىنىڭ 11 انالىعى مەن 20 اتالىعىنا ەلەكتروندى ءتول قۇجات تاعىلدى.

ميكروچيپ سالىنعاننان كەيىن ارنايى سكانەردىڭ كومەگىمەن ول بالىقتىڭ تەگى انىقتالادى. بۇل بالىقتىڭ گەنەتيكالىق ءتول قۇجاتى دەسە دە بولادى. وندا بارلىق اقپاراتتار جيناقتالعان. بۇل بالىقتار زاۋىتتىڭ ارنايى توعاندارىندا قىسى-جازى باعىلادى.

زاۋىت سوڭعى جىلدارى اتالىق پەن انالىق بالىقتاردان تىرىدەي تۇقىم الۋ ءادىسىن ەنگىزدى. بۇل ءىرى بالىقتاردىڭ باسىن ساقتاۋعا يگى ىقپال ەتۋدە.

- اتالىق-انالىق بەلگىدەگى بالىقتاردىڭ گەنەتيكالىق قۇرىلىمىن ءبىلۋدىڭ ارقاسىندا بىزدەر ولاردان الىناتىن تۇقىمداردىڭ گەنەتيكالىق الۋان تۇرلىلىگىن، تۋىستىق الشاقتىلىعىن ساقتاپ قالامىز. بۇل ءوز كەزەگىندە بولاشاق جاس بالىقتاردىڭ تابيعاتقا بەيىمدىلىگىن ارتتىرا تۇسەدى، دەيدى «جايىق-اتىراۋ» بالىق ءوسىرۋ زاۋىتىنىڭ ديرەكتورى عيلمەن سارسەماليەۆ.

«شوقىر بالىعى كاسپي تەڭىزىندەگى بەكىرە تۇقىمداستاردىڭ نەگىزى بولىپ سانالادى. سوندىقتان «قىزىل بالىقتىڭ» وسى ءتۇرىنىڭ تۇراقتى قورىن جاساقتاۋ تۋرالى ماسەلە وتە وزەكتى. بۇگىندە تابيعي ورتادا بەكىرە تۇقىمداستاردىڭ ىشىندە سۇيرىك، قورتپا بالىعى مۇلدە ازايىپ كەتتى. ەندەشە ازىرگە تۇقىمى ساقتالىپ تۇرعان قالعان شوقىردىڭ باسىن كوبەيتۋ - كەزەك كۇتتىرمەيتىن ءىس. تاجىريبە رەتىندە قولعا الىنعان شارا وڭ ناتيجە بەرسە، بەكىرە تۇقىمداستاردىڭ قالعان تۇرلەرى دە وسىلاي قولدان كوبەيتىلمەك»، دەپ حابارلايدى تەلەارنا.