17:52, 09 - شىلدە 2016 | GMT +5
جولاۋشىلار ۇشاعى جاڭىلىسىپ، ا ق ش اسكەري- اۋە كۇشتەرى بازاسىنا قونعان
استانا. قازاقپارات - Delta Air Lines اۋە كومپانياسىنىڭ جولاۋشىلار ۇشاعى وڭتۇستىك داكوتا شتاتىنداعى ازاماتتىق اۋەجايعا قونۋدىڭ ورنىنا ا ق ش اسكەري بازاسىنىڭ اەرودرومىنا قونعان، دەپ حابارلايدى ريا نوۆوستي.
ازاماتتىق اۋە كەمەسىمەن بولعان وقيعا بەيسەنبى كۇنى ەلسۋورت ااك بازاسىندا ورىن الدى. ا320 اۋە لاينەرىنىڭ بورتىندا ميننەاپوليس اۋەجايىنان رەپيد- سيتي اۋەجايىنا ۇشقان 130 جولاۋشى بولعان.
اەرودرومداعى ساقتىق شاراسى رەتىندە اسكەريلەر ۇشاقتى قورشاپ، جولاۋشىلارعا يلليۋميناتور پەردەلەرىن جابۋدى بۇيىرعان جانە ۇشاقتى يتپەن تەكسەرىپ شىققان.
سوڭىندا لاينەر ۇشۋعا رۇقسات الىپ، رەپيد- سيتي اۋەجايىنا ءۇش ساعات كەشىگىپ قوندى.
الدىن الا اقپاراتتار بويىنشا، اسكەري بازا مەن ازاماتتىق اۋەجاي اراسى 8 شاقىرىم بولسا دا، ۇشقىش كومپاس باعدارىندا بىردەي كورسەتىلگەن ۇشۋ- قونۋ جولاقتارىن شاتاستىرىپ العان.
اۋە كومپانياسى ۇشقىشتاردىڭ جۇمىستان ۋاقىتشا شەتتەتىلگەنى تۋرالى حابارلادى.
