تورەعالي تورەالى ەركە ەسماحاندى قىرعىز انشىسىنە «ايىرباستاپ» جىبەردى
بۇگىندە، تورەعاليدىڭ ءاربىر ءانى حيت. كونسەرت، توي ونىڭ ءانىنسىز وتپەيدى. سوندىقتان بولار، جۇمىس كەستەسى دە تىعىز. ءاربىر تويىنان 5 مىڭ دوللار تابىس تاباتىن ءانشىنىڭ ەل- ەلدى ارالاپ كونسەرتتەن قولى تيمەيدى ەكەن. بۇل جايىندا ءانشىنىڭ ءوزى ەمەس، ءوزىن ارت- ديرەكتورىمەن دەپ تانىستىرعان كومەكشىسى ايتتى.
«بارعان جەرىمىز قايتادان شاقىرىپ جاتىر. اقتاۋ قالاسىندا 5 كونسەرتتەن، اتىراۋ قالاسىندا ەكى كۇن قاتارىنان 5 كونسەرت بولدى، اقتوبەگە ءبىر باردىق اقپان ايىندا، ناۋرىز ايىندا قايتادان باردىق"، - دەيدى ارت- ديرەكتور فاريزا وسپاندياروۆا.
وسى اپتادا ءانشى تورەعالي تورەالى "قازاق قىزىنا ۇيلەنەمىن" اتتى شىعارماشىلىق كەشىن الماتىدا، رەسپۋبليكا سارايىندا اتاپ ءوتتى. ساحنا شىمىلدىعىن "اسسالاۋماعالەيكۋم" اتتى جاڭا انمەن اشتى.
رەسپۋبليكا سارايىندا وسىمەن ەكىنشى رەت كونسەرت بەرگەن ءانشىنىڭ ءاربىر قيمىلىن، ءاربىر ايتقان ءسوزىن كورەرمەن جوعارى باعالاپ، ءتىپتى انشىمەن بىرگە ءان دە سالىپ وتىردى.
جەكە كەشىنە ءانشى ەكى اپتا دايىندالعان، تورەعالي ون بەس شاقتى جاڭا ءان جازىپ ۇلگەرگەن.
ارت- ديرەكتوردىڭ ايتۋىنشا، كونسەرت باستان- اياق فونوگرامماسىز ءوتتى. «قىزعانامىن»، «انگە ارنادىم ءانىمدى»، «ارال»، «تورەشىڭ» اتتى اندەرىن ورىنداعاندا تورەعالي ەرەكشە ءبي بيلەپ، ساعىنعان حالقىن ءبىر كوڭىلدەندىرسە، «مەن رومانتيك ەمەسپىن» دەگەن تۋىندىسىندا زالدا وتىرعان ايەل قاۋىمىنا راۋشان گۇلدەر سىيلادى.
باستاپقىدا «اللو» ءانىن ءانشى تورەعالي ەركە ەسماحانمەن بىرگە ورىنداعان بولاتىن. وسىدان جارتى جىل بۇرىن شىققان تۋىندى حالىققا جىلدام تاراپ، ءاپ- ساتتە حيتقا اينالىپ شىعا كەلدى. الايدا، قارجىعا بولا كەلىسپەگەن ەكى پروديۋسەردىڭ داۋى ۇلعايىپ، قوس ءانشى ەكى جاققا كەتكەن ەدى.
الايدا، جاقىندا ەكى ءانشى تاتۋلاستى دەپ تەلەارنالاردىڭ بىرىندە جاريالانعان بولاتىن. دەگەنمەن، تورەعالي ءوزىنىڭ كونتسەرتىنە ەركەنى ەمەس، قىرعىز ءانشىسىن ارنايى قىرعىزستاننان شاقىرتىپتى. ەلدىڭ كوپتەن كۇتكەن "اللو" ءانىن تورەعالي، نارگيزا ايتەمىروۆا ەسىمدى قىرعىز انشىسىمەن ورىنداپ، ەلدى ءبىر تاڭعالدىردى.
قوس تاراپ داۋلاسسا دا، حيتكە اينالىپ كەتكەن ءاننىڭ تابىسىن ولار قاق بولەتىن سياقتى.
قىرعىز شوۋ- بيزنەسىندە نەبارى ەكى جىل ءان سالىپ جۇرگەن نارگيزا ايتەمىروۆا "اللو" ءانىن العاش ورىنداپ تۇرعان جوق. ويتكەنى، ول وسى ۋاقىتقا دەيىن بۇل ءاندى ءوز ەلىندە جاقۋت سىدىقوۆ ەسىمدى انشىمەن تويلار مەن كورپوراتيۆتى كەشتەردە شىرقاپ جۇرگەن.
"بۇل ىردى، مەنىمەن ىرلاپ جۇرگەن، جاقۋت سىدىقوۆ، ۇسىنىس تاستاعان دۋەت ىرلايىق دەپ، دۋەت ىردادىق، قازىردە قىرعىزستان دا حيت بولىپ تۇرعان كەزى. قازاقستاندا حيت ەكەنىن بىلەمىن"، - دەيدى قىرعىز ءانشىسى نارگيزا ايتەمىروۆا.
مادەنيەت ءمينيسترى ەكى ەل اراسىنا سىزات ءتۇسىرىپ جاتقاندا، حالىق ونى جالعاعىسى كەلەدى.
"چيپ- چيپ"، "اسپانعا قارايمىن" سىندى حيت اندەردىڭ ورنىن باسىپ، ەلدىڭ سۇيىكتى انىنە اينالعان "اللو"، "بول جانىمدا" اندەرىن تىڭداۋ ءۇشىن تورەعاليدى تەك ەلىمىز عانا ەمەس، سونداي- اق الىس جاقىن قىتاي، مونعوليا، قىرعىزستان سىندى ەلدەر دە ءجيى شاقىرتاتىن بولىپتى. جازدان باستاپ ءانشى سول ەلدەرگە گاسترولگە شىقپاق.
