جەر بولەتىن كوميسسيانىڭ باسىم بولىگى قاراپايىم حالىق وكىلدەرىنەن بولۋى كەرەك - د. كوشىم

استانا. قازاقپارات - جەر بولەتىن كوميسسيا مۇشەلەرىنىڭ باسىم بولىگى اتقارۋشى بيلىكتەن ەمەس، قاراپايىم حالىق وكىلدەرىنەن تۇرۋى ءتيىس.

جەر رەفورماسى جونىندەگى رەسپۋبليكالىق كوميسسيانىڭ وتىرىسىندا ساياساتتانۋشى، كوميسسيا مۇشەسى دوس كوشىم وسىلاي ءمالىم ەتتى.

دوس كوشىمنىڭ ايتۋىنشا، جەردى بولەتىن، وعان قاتىستى كونكۋرستى وتكىزەتىن كوميسسيانىڭ جۇمىسى اشىق ءارى جاريالى تۇردە بولۋى كەرەك. «قولدانىستاعى ەرەجەدە جەردى بولەتىن كوميسسيالار تۇراقتى جۇمىس ىستەيدى دەگەن نورما بار. ءبىراق، ولاردىڭ مەرزىمى دە قۇقىعى دا ناقتىلانۋى شارت. ويتكەنى، اكىم اۋىسقان سايىن وزىنە ءتيىمدى كوميسسيانى قۇرىپ الادى. سوندىقتان دا، ءبىز جەردى ءبولۋ كوميسسياسى بەس جىل تۇراقتى مەرزىممەن جۇمىس ىستەۋى كەرەك دەگەن نورمانى ۇسىنىپ وتىرمىز»، - دەدى دوس كوشىم.

ونىڭ ايتۋىنشا، قولدانىستاعى تاعى ءبىر ولقى ماسەلە كوميسسيانىڭ مۇشەلەر سانىنا قاتىستى.

«ءبىز جەر ءبولۋ كوميسسياسىنا سول اۋدانداعى بارلىق اۋىلدىق وكرۋگتەردەن ءبىر ادامنان مۇشە بولۋى كەرەك دەپ سانايمىز. كوميسسيا اي سايىن جۇمىس ىستەمەيدى، تەك جەر بولەتىن كەزدە عانا باس قوسادى. سوندىقتان دا، ول كوميسسيادا ءاربىر اۋىلدىڭ وكىلى بولۋى شارت»، - دەدى د. كوشىم. بۇدان بولەك، ساياساتكەر جەر ءبولۋ كوميسسياسىنىڭ قۇرامىندا اۋداندىق پروكۋرور مىندەتتى تۇردە بولىپ، ونىڭ زاڭدىلىعىن قاداعالاپ وتىرۋى قاجەتتىگىن اتاپ ءوتتى. «قىسقاسى كوميسسيانىڭ ۇشتەن ءبىرى عانا ناقتى ماماندار مەن بيلىك وكىلىنەن تۇرسا. قالعان ۇشتەن ەكىسى قاراپايىم حالىقتىڭ وكىلىنەن بولۋى كەرەك»، دەدى د. كوشىم.

سونىمەن قاتار، ول كونكۋرستىق كوميسسيالاردىڭ مىندەتتى تۇردە اشىق ءوتۋى قاجەتتىگىن ەسكە سالدى. ونىڭ ايتۋىنشا، بۇل قولدانىستاعى ەرەجەدە قاراستىرىلماعان. وسىعان بايلانىستى، جەر بولۋگە قاتىستى كونكۋرستىق كوميسسيانىڭ جۇمىسىنا قىزىعۋشىلىق تانىتاتىن ازاماتتاردىڭ كەز كەلگەنى تولىق قاتىسا الۋى شارت.

«ءبىزدىڭ قولدانىستاعى ەرەجەدە ءبىر قىزىق باپ بار ەكەن: ەگەر كوميسسيا مۇشەلەرىنىڭ داۋىسى تەڭ بولسا، وندا ءتوراعانىڭ داۋىسى ەكى داۋىسقا يە بولادى دەپ جازىلىپتى. بۇل باياعى ءارحايزمنىڭ قالدىعى. ادام قۇقىعىن بۇزاتىن بۇنداي نورما بولماۋى كەرەك. ءار ادام تەك ءبىر داۋىسقا يە بولۋى ءتيىس»، دەدى د. كوشىم.

ءسوز اراسىندا ساياساتكەر كونكۋرستىق تالاپتارعا قاتىستى سىبايلاس جەمقورلىقتار كورىنىسىن جويۋعا دا نازار اۋدارتتى. ونىڭ ايتۋىنشا، كونكۋرستىڭ تالاپتارى قازىر سونىڭ جەڭىپ الاتىن تاراپقا ىڭعايلى جاسالادى. «بۇل جاسىرىن دا ەمەس. ماسەلەن، ۇتاتىن ادامدا مىناداي ماركاداعى بەس تراكتورى بولۋى كەرەك دەپ جازادى. ءسۇيتىپ، تەك جەڭۋى ءتيىس ادامعا عانا لايىقتالعان تالاپتار جازىلادى. سوندىقتان دا، كونكۋرستىڭ تالاپتارىن قايتا قارايىق»، دەدى ول.

اۆتور: قانات مامەتقازى ۇلى