وبلىس اكىمدەرى پرەمەر-مينيسترگە جالاقى قارىزدارىنىڭ تولەنۋى بويىنشا ەسەپ بەردى

استانا. قازاقپارات - ق ر پرەمەر-ءمينيسترى كارىم ءماسىموۆ وبلىس اكىمدەرىنە كاسىپورىندارداعى جالاقى قارىزدارىنىڭ تولەنۋى بويىنشا ماسەلەنى ءوز باقىلاۋلارىنا الۋدى تاپسىردى.

ۇكىمەت وتىرىسى كەزىندە اكىمدەر اتالعان ماسەلەگە قاتىستى اعىمداعى جاعدايدى باياندادى. بارلىق وبلىستاردا جاعداي تۇراقتى باقىلاۋعا الىنعان.

اقمولا وبلىسىندا جالاقىنىڭ تولەنۋى بويىنشا جالپى قارىز كولەمى 242 ميلليون تەڭگەنى قۇرايدى.

«بۇل قارىز 4 كاسىپورىنعا قاتىستى، بانكروت بولعان 2 كاسىپورىن بويىنشا قارىز كولەمى - 198 ميلليون تەڭگە، 29,7 ميلليون تەڭگە - اعىمداعى قارىز كولەمى، 14,9 ميلليون تەڭگە - مەرزىمى ءوتىپ كەتكەن قارىز»، - دەدى اكىم سەرگەي كۋلاگين.

اقمولا وبلىسىنىڭ اكىمىنىڭ ايتۋىنشا، اتالعان ماسەلە ايماق باسشىسىنىڭ جانە قۇقىق قورعاۋ ورگاندارىنىڭ باقىلاۋىنا الىنعان.

«بىزدە ءبىر سەرۆيستىك كومپانيانىڭ 11,7 ميلليون تەڭگە سوماسى كولەمىندەگى قارىزى بار. بۇل كومپانيامەن جۇمىس ىستەپ جاتىرمىز، جۇمىس توبى قۇقىق قورعاۋ ورگاندارىمەن بىرلەسىپ ماسەلەنى تۇراقتى باقىلاۋدا ۇستاپ وتىر»، - دەپ ەسەپ بەردى اقتوبە وبلىسىنىڭ اكىمى بەردىبەك ساپاربايەۆ.

الماتى وبلىسىندا مەرزىمى ءوتىپ كەتكەن قارىز كولەمى 9,6 ميلليون تەڭگەنى قۇراعان.

«ولار - بانكروت بولعان 5 كاسىپورىن، مۇلكى ساتىلعان سوڭ قىزمەتكەرلەرگە جالاقى تولەنەدى. جالپى العاندا، قارىز كولەمى 25,8 ميلليون تەڭگەنى قۇرايدى»، - دەپ اتاپ ءوتتى وبلىس اكىمى اماندىق باتالوۆ.

ەسكە سالايىق، ۇكىمەتتىڭ وتكەن وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا جىل باسىنان بەرى مەملەكەتتىك ەڭبەك ينسپەكتورلارى قازاقستان كاسىپورىندارى بويىنشا 2,8 ميلليارد تەڭگە جالاقى قارىزىن انىقتاعانىن ايتتى. ونىڭ 2,4 ميلليارد تەڭگەسى وتەلگەن. ءوز كەزەگىندە، كارىم ءماسىموۆ اكىمدىكتەر مەن بەيىندى ۆەدومستۆوعا اتالعان ماسەلەنى باقىلاۋعا الۋدى تاپسىردى، دەپ جازادى Pm.kz.