بۇگىن قازاقستان ارمياسى تۇنگى دابىل بويىنشا كوتەرىلدى

استانا. قازاقپارات - بۇگىن تۇندە وقۋ دابىلىنىڭ بەلگىسى بويىنشا قازاقستاننىڭ قارۋلى كۇشتەرى جاۋىنگەرلىك ازىرلىكتىڭ جوعارى دارەجەسىنە كەلتىرىلدى.

بيىلعا اسكەرلەر تۇنگى ۋاقىتتا العاش رەت كوتەرىلدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

بۇل قازاقستاندىق ارميانىڭ جاۋىنگەرلىك ازىرلىگىن تەكسەرۋدىىڭ ەرەكشەلىگى بولىپ تابىلادى. بۇل رەتتە ديۆەرسيالىق قاۋىپسىزدىككە ەرەكشە نازار اۋدارىلدى. بولىمشەلەر جەدەل تاپسىرما الدى، وقۋ-جاۋىنگەرلىك تاپسىرمالاردى ورىندادى. قارۋلى كۇشتەر اۋقىمىنداعى وقۋ دابىلى - وسى اپتا بويى ەلىمىزدىڭ قارۋلى كۇشتەرىندە ءوتىپ جاتقان جاۋىنگەرلىك ازىرلىك بويىنشا ساباقتاردىڭ سوڭعى بولىگى. ءىس-شارالار قاراپايىمنان كۇردەلىگە قاعيداتى بويىنشا وتكىزىلدى.

ەڭ الدىمەن بولىمشەلەر مەن ۆزۆودتار دەڭگەيىندە، ءارى قاراي روتالار مەن باتالوندار، اسكەري بولىمدەر، وڭىرلىك قولباسشىلىقتار (اسكەر تەكتەرى)، سودان كەيىن اسكەر تۇرلەرى مەن جالپى ق ر ق ك دەڭگەيىندە ءوتتى.

تۇرلەر مەن اسكەر تەكتەرىن، وڭىرلىك قولباسشىلىق اسكەرلەرىن باسقارۋ ورگاندارىندا الەۋمەتتىك سيپاتتاعى توتەنشە جاعدايلاردى جويۋ كەزىندە شتابتاردىڭ ۇيلەسۋى بويىنشا جەكەلەگەن جانە بىرلەسكەن شتابتىق جاتتىقتىرۋلار وتكىزىلدى. اسكەري قىزمەتشىلەر كاسىبي جاۋىنگەرلىك جانە دەنە دايارلىعىنىڭ نەگىزگى نورماتيۆتەرى بويىنشا سىناق تاپسىرىپ، گرافيكالىق جانە وزگە دە جاۋىنگەرلىك قۇجاتتاردى ازىرلەدى.

اسكەري جانجالدار سيپاتىنىڭ كۇرت وزگەرۋى، سونداي-اق، قارۋ-جاراق پەن اسكەري تەحنيكانىڭ زاماناۋي ۇلگىلەرىنىڭ ەنگىزىلۋى جاعدايىندا اسكەري قىزمەتشىلەرگە وزدەرىنىڭ تەوريالىق جانە پراكتيكالىق بىلىمدەرىن جەتىلدىرۋ، قىسقا مەرزىمدە جان-جاقتى دايىندىقتى جۇزەگە اسىرۋعا، ۇيىمداسقان تۇردە قارسىلاسپەن ۇرىسقا تۇسۋگە جانە قويىلعان تاپسىرمانى ورىنداۋ ءۇشىن ۇدايى جاۋىنگەرلىك ازىرلىكتە بولۋ ماڭىزدى.