پاۆلودار وبلىسىندا جومارت جاندار ءورت سالدارىنان دالادا قالعان وتباسىنا باسپانا سىيلادى - فوتو
مۇنداي توسىن سىيدى كۇتپەگەن ءتورت بالانىڭ اناسى ەلميرا جاسىبايەۆانىڭ ايتۋىنشا، ساۋاپتى ءىس جاساعان پاۆلودارلىق مەتسەناتتار وزدەرىنىڭ اتى-ءجونىن جاسىرىن قالدىرۋدى ءجون كورگەن. رۋستام جانە الەكساندر ەسىمدى قوس ازامات الدىمەن تەلەفون ارقىلى ساتىپ الاتىن باسپانا ىزدەستىرۋدى تاپسىرىپ، تولەماقىنى وزدەرى وتەۋگە ۋادە بەرگەن. سوزىنە بەرىك دەمەۋشىلەر كوپ ۇزاماي ءبىر وتباسىنىڭ ارمانىن ورىنداپ، 2 ميلليون 300 مىڭ تەڭگەگە ءتورت بولمەلى ءۇيدىڭ كىلتىن تابىستاعان.
- بالالارمەن دالادا قالعان ساتىمدە پاتەر جالداپ ساندالاتىن شىعارمىن دەپ ويلاعان ەدىم. الايدا مەيىرىمدى جاندار بار ەكەنىنە كوزىم جەتتى. ولارعا دەگەن ريزاشىلىعىمدى قالاي جەتكىزەرىمدى بىلمەيمىن. الەۋمەتتىك جەلىلەر ارقىلى قيىندىققا تاپ بولعانىمىزدى بىلگەن ەرىكتىلەر مەن سپورتشىلار كەلىپ، ازىق-تۇلىك، كيىم-كەشەك اقشالاي اكەلىپ ۇستاتتى. قاسيەتتى رامازان ايى باستالاردا قيىندىققا تاپ بولعان ەدىك، ورازا ايت مەرەكەسىن جاڭا ۇيدە قارسى الدىق، - دەيدى «شارباقتى-قۇس» فابريكاسىندا جۇمىس ىستەيتىن ەلميرا جاسىبايەۆا.
ايتا كەتەرلىگى، جاڭادان قونىس اۋدارعان باسپانا تولىق جوندەۋدەن وتكەن. اۋلادا جەكە جازعى اس ءۇي مەن مونشا ورنالاسقان.
ەسكە سالا كەتەيىك، شارباقتى اۋدانىندا، 6-ماۋسىمعا قاراعان ءتۇنى ورىن العان ءورت كوپ بالالى وتباسىنىڭ باسپاناسىن جالماپ كەتكەن بولاتىن. شامامەن ساعات تۇنگى ءبىردىڭ كەزىندە ەلميرا جاسىبايەۆا توبەدەن تارس-تۇرس وق اتقانداي داۋىستان شوشىپ ويانعان. ول كىرەبەرىس ەسىككە بەت العانىندا قىزىل جالىننىڭ ءۇيدىڭ ءىشىن شارپىعانىن جانە گاز باللونى جارىلعانىن كورگەن. ابىروي بولعاندا، ءۇي ءىشى ءدىن امان قالدى.
