وڭتۇستىك قازاقستان وبلىسىندا شەكارا بويىنداعى ۇيلەردى كوشىرۋ جايى ايتىلدى
وبلىس اكىمدىگىنىڭ باسپا ءسوز قىزمەتىنىڭ حابارلاۋىنشا، ماجىلىستە 2005-جىلى قازاقستان رەسپۋبليكاسى مەن وزبەكستان رەسپۋبليكاسى اراسىنداعى شەكارا دەماركاتسيالانىپ، شەكارا سىزىعى انىقتالعاننان كەيىن وندا قالىپ قويعان دوستىق ەلدى مەكەنىندەگى 10 ءۇيدىڭ ماسەلەسى قارالدى.
سونداي-اق، باس قوسۋدا اتالعان 10 وتباسىنى كوشىرۋ ماقساتىندا دوستىق اۋىلىنا باراتىن اباي- كالحاباد تاس جولىنىڭ ەكى جاق بەتىنەن 80 گەكتار جەردى بەرۋ ءۇشىن دوستىق ەلدى مەكەنىنىڭ وڭتايلاندىرىلعان جوسپارى جاسالعانى ايتىلدى.
جيىندا ايماق باسشىسىنىڭ تاپسىرماسىنا سايكەس، اتالعان ەلدى مەكەننىڭ تۇرعىندارىمەن كەزدەسىپ قايتقان وبلىس اكىمىنىڭ ورىنباسارى ج. بوكەنبايەۆ ءمان-جايدى باياندادى. ول ءوز سوزىندە تۇرعىنداردىڭ مۇلكىن زاڭداستىرۋعا كومەكتەسۋىن جانە مەملەكەت تاراپىنان وتەماقى الىپ، باسقا جەرگە كوشىرۋ تۋرالى وتىنىشتەرىن جەتكىزدى.
سونداي-اق، وبلىس اكىمىنىڭ ورىنباسارى بۇل اۋماققا مەملەكەت ەسەبىنەن گاز، سۋ تارتۋ ەكونوميكالىق جاعىنان ءتيىمسىز بولعاندىقتان بۇگىنگە دەيىن اۋىل تۇرعىندارى كوگىلدىر وتىنسىز جانە اۋىز سۋدى 3 شاقىرىم قاشىقتىقتا ورنالاسقان ۇشقىن ەلدى مەكەنىنەن تاسىمالداپ ءىشىپ كەلەتىنىن ايتتى.
جيىندى قورىتىندىلاعان وبلىس اكىمى بۇل ماسەلە بويىنشا ارنايى جۇمىس توبىن قۇرۋدى جانە اۋىل تۇرعىندارىن باسقا جەرگە قونىستاندىرعانشا اۋىز سۋمەن قوسا سىعىمدالعان گازبەن قامتاماسىز ەتىلۋى قاجەتتىگىن ايتتى. سونىمەن قاتار، اۋدان اكىمدىگىنە شۇعىل تۇردە اتالعان ۇيلەر بويىنشا تۇگەندەۋ جۇمىستارىن جۇرگىزۋدى جانە مۇلىكتى زاڭداستىرۋ بويىنشا قۇجاتتارىن راسىمدەۋگە كومەكتەسۋدى تاپسىردى.
