استانالىق ارتىستەر «ازيا جاڭعىرىعى» حالىقارالىق فەستيۆالىندە توپ جاردى
نازەركە مەرەكە قىزى مەن ەكا قوڭىربايەۆا الەمدە ورىندالۋ جاعىنان ەڭ كۇردەلى ءارى قىزدار ورىنداي قويمايتىن تريۋكتى پاش ەتتى. ەكۆيليبري جانرىندا ونەر كورسەتكەن قىزداردىڭ ءبىرى نازەركە مەرەكە قىزىنىڭ بۇل ۇلكەن سيرك ارەناسىنداعى دەبيۋتى ەكەن.
«ءبىزدىڭ ءنومىردىڭ اتى شتەين - تراپە. ەكۆيليبردىڭ ءبىر ءتۇرى. بۇل شتەين- تراپەدە كوبىنەسە بالانسپەن جۇمىس جاسايمىز. تەپە-تەڭدىكپەن. رەكوردتى تريۋكتەر بار. 12 مەتر بيىكتىككە جۇمىس جاسايمىز جانە بۇل كۇنگە دەيىن قىزدار بۇل ءنومىردى جاساماعان»، - دەيدى سيرك ءارتىسى نازەركە مەرەكە قىزى.
بۇل فەستيۆال وسىمەن توعىزىنشى جىل قاتارىنان وتكىزىلىپ وتىر. ونەر سايىسىنا 8 ەلدەن سيرك ارتىستەرى كەلگەن. ولاردىڭ اراسىندا موڭعوليا، تۇرىكمەنستان، رەسەي، بەلارۋس جانە قىرعىزستان مەن نيدەرلاند اكروباتتارى بار. سيقىرشىلار مەن كلوۋندار جانە ەكۆيليبريستەر دە وسى ورتادان تابىلدى.
