قازاقستاندا مۋزارت ەسىمدى بالالار كوبەيىپ كەلەدى
توپ ءسوليسى ساكەن مايعازيەۆتىڭ Instagram جەلىسىندە جاريالاعان سۋرەتىندەگى تۋۋ تۋرالى كۋالىكتە ۇل بالانىڭ 2016-جىلدىڭ 24- ماۋسىمدا دۇنيەگە كەلگەنى جانە وعان نۇرتازا مۋزارت دامير ۇلى اتى-ءجونىنىڭ قويىلعانى كورسەتىلگەن. نارەستە اتىراۋ قالاسىندا تۋعان.
ءانشىنىڭ ايتۋىنشا، توپتىڭ اتاۋىن بالالارىنا ەسىم رەتىندە قويعان وتباسىلار كوپ ەكەن. ماسەلەن، وسىعان دەيىن وڭتۇستىك قازاقستان وبلىسىنداعى تاۋكەنت اۋىلىندا دا اتا-اناسى بالاسىنا «مۋزارت» دەگەن ەسىم بەرىپتى. «ۋز» - «سەرى»، «باتىل»، «جىگەرلى» دەگەن ماعىناداعى ءسوز. «ارت» دەگەن «شىڭنىڭ باسى» دەگەن ماعىنانى بىلدىرەدى. بۇل «ۋزارت» دەگەن اتاۋدى بىزگە اكتەر اعامىز ءساعادىلدا ءۇسىبالى ويلاپ تاپتى دەپ، جاناتبەك پەن ءسابيت ۇسىندى. سوسىن ءبىز، مەيرامبەك پەن ماقسات بار، الدىنا «م» دەگەن ءارىپتى قويايىق، «مۋزارت» بولسىن دەدىك. سەبەبى «مۋز» دەگەن مۋزىكاعا كەلەدى ەكەن، «ارت» دەگەن جاڭا ونەر دەگەندى بىلدىرەدى ەكەن دەپ، بارلىعىمىز ۇناتتىق. كەزىندە قازاقتار تيان-شان شىڭىن «مۇزارت» دەپ اتاعان ەكەن. بۇل ءبىر سوزبەن ايتقاندا جان-جاقتى جاقسى ماعىنانى بەرەتىن اتاۋ. ونىڭ ۇستىنە بۇل مەيرامبەك، ماقسات، مايعازيەۆ دەگەندەگى العاشقى ارىپتەرى دەپ جاقسىلىققا بالادىق. ايتپەسە ءبىز اتى جوق تريو بولىپ جۇرگەن ەدىك. بۇل 2001-جىلدار ەدى. ساۋىردە قۇرىلىپ، كۇزگە تامان وسى اتتى قويدىق»، - دەدى ءانشى توپتىڭ قۇرىلعان جىلدارىن ەسكە الا وتىرىپ.
سونىمەن قاتار، ساكەن مايعازيەۆ بۇل اتاۋدىڭ بالالارعا «مۇزارت» بولىپ قويىلىپ جاتسا، ابەستىك كورمەيتىنىن ايتتى. «سەبەبى مۋزارت حالىق اۋزىندا جۇرگەن جاقسى توپ. وسى توپتىڭ مۇشەسى ەكەنىمدى ماقتان ەتەمىن. ءبىز جامان نارسەنى ناسيحاتتاپ جۇرگەن جوقپىز. ەلدىڭ اۋىزبىرشىلىگىن، وتانسۇيگىشتىكتى، اتا-انانى قادىرلەۋدى جىرلاپ جۇرگەن توپ بولعاندىقتان، ەلىمىزدە بالالارعا وسى ات قويىلىپ جاتسا، ءبىز بۇعان قۋانامىز»، - دەدى مايعازيەۆ.
ايتا كەتەيىك، ەلوردا كۇنىنە وراي حالىق تاعاتسىز كۇتەتىن شارالاردىڭ ءبىرى بارشا قازاقستاندىقتاردىڭ سۇيىكتى «مۋزارت» توبىنىڭ كونسەرتى وتەدى. كەڭىنەن تانىمال تريو ءوز تىڭدارماندارىن اسەم اندەرىمەن 15 جىلدان بەرى قۋانتىپ كەلەدى، الداعى كونسەرت تە بۇل مەرەيتويلىق داتاعا ورايلاستىرىلماق.
ارتىستەردىڭ ايتۋىنشا، استانادا ۇلكەن كونسەرت وتكىزۋ - ولاردىڭ كوپتەن بەرگى ارمانى، ەلوردا تۇرعىندارى مەن قوناقتارى دا بۇل وقيعانى تاعاتسىز كۇتۋدە. 8- شىلدەدە «مۋزارت» توبى «قازاقستان» وكز ەكى رەت كونسەرت بەرەدى. ساكەن مايعازيەۆ، مەيرامبەك بەسبايەۆ پەن كەنجەبەك ءجانابىلوۆ وزدەرىنىڭ ۇزدىك اندەرىن ديريجەرلەر الەكساندر بەلياكوۆپەن جانە الەكساندر ابىلايەۆپەن، كومپوزيتور ءارى پروديۋسەر رينات عايسينمەن، «استانا» ەسترادالىق-سيمفونيالىق وركەسترىمەن ورىندايدى.
