استانا كۇنى مەرەكەسىندە شاردارادا مۇراجاي اشىلدى
وبلىس اكىمىنىڭ باسپا ءسوز قىزمەتىنىڭ حابارلاۋىنشا، بيۋدجەتتەن بولىنگەن 107 ميلليون تەڭگەگە اۋدانى 1800 شارشى مەتردى قۇرايتىن مۇراجاي قۇرىلىسى بىلتىر شىلدە ايىندا باستالىپ، وسى جىلعى شىلدەگە دەيىن «جەر-سۋ-جول-سەرۆيس» ج ش س- مەن جۇرگىزىلىپ، ۋادەلى مەرزىمدە تاپسىرىلدى.
جاڭا عيماراتتىڭ اشىلۋ سالتاناتىنا وبلىس اكىمىنىڭ ورىنباسارى ج. بوكەنبايەۆ، وبلىستىق ءماسليحاتتىڭ حاتشىسى ق. ايتورەيەۆ، اۋدان اكىمى ا. ابدۋللايەۆ، وبلىستىق تاريحي- ولكەتانۋ مۇراجايىنىڭ ديرەكتورى گ. ارەنوۆا قۇتتىقتاۋ ءسوز سويلەپ، جاڭا مۇراجاي حالىقتىڭ يگىلىگىنە قىزمەت كورسەتە بەرسىن دەگەن تىلەكتەرىن ايتىستى.
قۇرىلىس جۇمىسىن جۇرگىزگەن «جەر-سۋ-جول-سەرۆيس» سەرىكتەستىگىنىڭ باس ينجەنەرى قانات ەرجىگىت جاڭا نىساننىڭ كىلتىن اۋداندىق تاريحي-ولكەتانۋ مۇراجايىنىڭ ديرەكتورى نۇرلان سىمايىلوۆقا سالتاناتتى تۇردە تابىس ەتتى. عيماراتتىڭ اشىلۋ سالتاناتىنا كۋا بولعان ەڭبەك ارداگەرلەرى مەن قالا تۇرعىندارى ەل يگىلىگىنە بەرىلىپ وتىرعان مۋزەي ءۇيىنىڭ ءىشى- سىرتىن ارالاپ كورىستى. تالاپقا ساي سالىنعان قوس قاباتتى عيماراتتىڭ كوركىنە كوزدەرى تويعان ەڭبەك ارداگەرلەرى «بۇل نىسان استانا كۇنىنە لايىقتى تارتۋ بولدى» دەستى.
