استانادا نوعاي سۋرەتشىسىنىڭ كورمەسى وتەدى
ۇلتتىق مۋزەيدىڭ قوعاممەن بايلانىس ءبولىمىنىڭ حابارلاۋىنشا، كورمەگە رەسەيلىك سۋرەتشى- گرافيك الىبەك قويلاقايەۆتىڭ تۋىندىلارى قويىلادى، سونىمەن قوسا سۋرەتشى كورمە سوڭىندا كەلگەن قوناقتارعا گرافيكا ونەرىنەن ارنايى شەبەرلىك ءدارىسىن وتكىزەدى.
الىبەك قويلاقايەۆ - نوعاي ۇلتىنان شىققان سۋرەتشى. كراسنودار مەملەكەتتىك مادەنيەت جانە ونەر ۋنيۆەرسيتەتىنىڭ تۇلەگى. ءوزىنىڭ جىلدار بويعى ەڭبەگى مەن ءبىلىمىنىڭ ارقاسىندا سۋرەتشى ءوزىنىڭ جەكە ءادىسىن جەتىلدىرگەن: سۋرەت سالۋ كەزىندە الىبەك قاۋىرسىن مەن تۋش قولدانادى.
2016 -جىلى الىبەك قويلاقايەۆ تۇركيانىڭ انكارا، ىستامبۇل جانە ەسكىشەحير قالالارىندا ءوزىنىڭ جەكە كورمەلەرىن وتكىزگەن بولاتىن.
بۇعان دەيىن سۋرەتشى بۇكىل رەسەيلىك، رەسپۋبليكالىق فورۋمدارعا، ءىس- شارالارعا قاتىسىپ، ماسكەۋ (2010 ج. )، ماحاچكالا (2010-2012 ج ج. )، سانكت- پەتەربور (2011 ج. )، ستاۆروپول (2012-2013 ج ج. )، پياتيگورسك (2010-2013 ج ج.) قالالارىندا جەكە كورمەلەرىن وتكىزگەن.
