پويىزدا بوسانعان ايەل نارەستەسىن ۆاگوننان لاقتىرىپ جىبەرگەن

استانا. قازاقپارات - حاباروۆسك ولكەسى چەگدومىن اۋىلىنىڭ تۇرعىنىنىڭ ۇستىنەن پويىزدا بوسانعان بالانى لاقتىرىپ جىبەردى دەگەن كۇدىكپەن قىلمىستىق ءىس قوزعالدى.

جاڭا تۋعان نارەستەنىڭ دەنەسى تەمىر جول وتپەسىنەن تابىلعان، دەپ حابارلايدى ر ي ا نوۆوستي.

«الدىن الا اقپارات بويىنشا كۇدىكتى ايەلدىڭ چەگدومىن - حاباروۆسك جولاۋشىلار پويىزىنىڭ دارەتحاناسىندا قىز بالا بوسانعانى انىقتالدى. تۋا سالا نارەستەنى ۆاگون تەرەزەسىنەن لاقتىرىپ جىبەرگەن. حاباروۆسكىدەگى سەرىشەۆ- ۆورونەج كوشەلەرىندەگى تەمىر جول وتپەسىنەن بالا دەنەسى تابىلدى»، - دەپ جازىلعان مالىمدەمەدە.

كۇدىكتى ايەل 29 جاستا، ول چەگدومىن اۋىلىندا تۇرادى. حاباروۆسك قالاسىنا ءوزىنىڭ 9 جاسار ۇلكەن قىزىمەن كەلە جاتقان. قيىر شىعىس كولىك پوليتسياسى قىزمەتكەرلەرى 5 ساعاتتىڭ ىشىندە سول پويىزبەن حاباروۆسكىدەن چەگدومىنعا قايتقان كۇدىكتىنى ۇستادى. كۇدىكتىگە مەديتسينالىق كومەك كورسەتىلدى، 9 جاسار بالا كامەلەتكە تولماعاندارعا ارنالعان وڭالتۋ ورتالىعىنا جىبەرىلدى.

«قازىرگى ۋاقىتتا ر ف ت ك قيىر شىعىس كولىك تەرگەۋ باسقارماسىنىڭ تەرگەۋشىلەرى «انانىڭ بالاسىن ءولتىرۋى» بابى بويىنشا قىلمىستىق ءىس قوزعادى.