سەدوۆ وليمپياداعا بارمايتىنىن مالىمدەدى

استانا. قازاقپارات - وسىدان ءبىر اي بۇرىن تالدىقورعاندا وتكەن اۋىر اتلەتيكادان ەل بىرىنشىگىندە شۋ شىعارىپ، «جۇلدىزعا» اينالعان اۋىر اتلەت ۆلاديمير سەدوۆ ريو وليمپياداسىنا بارۋدان باس تارتتى.

ول بۇل تۋرالى «ك ت ك» تەلەارناسىنا بەرگەن سۇحباتىندا ءمالىم ەتتى. وندا زىلتەمىرشى اۋىر اتلەتيكادان ۇلتتىق قۇرامانىڭ باس باپكەرى الەكسەي نيدەن ابدەن كوڭىلى قالعانىن ايتادى.

كەشە ۇلتتىق وليمپيادالىق كوميتەت زىلتەمىرشى ۆلاديمير سەدوۆقا ريو- دە- جانەيرو وليمپياداسىنا قاتىسۋ ءۇشىن تاعى ءبىر مۇمكىنشىلىك بەرىلەتىنى تۋرالى حابارلاعان بولاتىن. وندا قر ۇلتتىق وليمپيادا كوميتەتىنىڭ پرەزيدەنتى تيمۋر قۇلىبايەۆ پەن ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى ريو- دە- جانەيرودا وتەتىن جازعى وليمپيادا ويىندارى قارساڭىندا ەل قۇراماسىمەن كەزدەسۋ وتكىزىپ، اۋىر اتلەتتەر اراسىنداعى باسەكەلەستىكتى ارتتىرۋ ءۇشىن بارلىق ۇمىتكەرلەردى، ونىڭ ىشىندە 2009 -جىلعى الەم چەمپيونى ۆلاديمير سەدوۆتى دا «باقىلاۋ زىلتەمىر كوتەرۋ» شاراسىنا جىبەرۋ تۋرالى شەشىم قابىلداعان ەدى.

مىنە، بۇگىن سپورتشىمىز «باس باپكەر دوپينگ داۋىنان كەيىن نە ىستەرىن بىلمەي قالدى. ەندى ماعان مۇمكىندىك بەرىپ، باعىڭدى سىناپ كور دەيدى. سپورتشى ءۇشىن بۇدان اسقان قانداي مازاق كەرەك؟! مەن الەكسەي نيدىڭ سوزىنە سەنۋدەن قالدىم. الداعى ۋاقىتتا ءبىر جارىسقا قاتىسسام دەپ جوسپارلاپ وتىرمىن. سودان كەيىن سپورتپەن قوشتاسىپ، مانسابىمدى اياقتايمىن»، - دەپ ريوعا بارمايتىنىن ايتىپ وتىر. ال، الدا قانداي جارىسقا قاتىساتىنى تۋرالى اشىپ ايتپادى.

اۆتور: كۇنسۇلتان وتارباي