الماتىلىقتار ەلوردا كۇنىن قالاي تويلايدى؟

استانا. قازاقپارات - بۇگىن الماتى قالاسىنىڭ بارلىق سەگىز اۋدانى كۇنى بويى ەلوردا كۇنىن مەرەكەلەيدى، دەپ حابارلايدى BNews.kz ءتىلشىسى.

الماتى تۇرعىندارى تاڭەرتەڭنەن وزدەرىنىڭ تۇرعىلىقتى ورنى بويىنشا الاتاۋ اۋدانىنداعى الاڭعا، «Family» ساياباعىنا، مەدەۋ اۋدنىنداعى ورتالىق دەمالىس جانە مادەنيەت ساياباعىنا، تۇركىسىب اۋدانىنداعى سەيفۋللين اتىنداعى ساياباققا، المالى اۋدانىنداعى «مەگا پارك» ساۋدا-ويىن-ساۋىق ورتالىعىنا، بوستاندىق اۋدانىنداعى «مەگا» ورتالىعىنا، جەتىسۋ اۋدانىنداعى «گۇلدەر» ساياباعىنا بارىپ، مەرەكەلىك كونسەرتتى تاماشالاي الادى.

ال كەشكىسىن ساعات 20:00 دە جۇرتشىلىققا رەسپۋبليكا سارايى الدىنداعى اباي الاڭىندا «جان جۇرەگىم - استانا» باعدارلاماسىمەن قازاقستاندىق ەسترادا انشىلەرى ونەر كورسەتەدى. قالا تۇرعىندارى مەن قوناقتارى باعدات سامەدينوۆا، ابىلاي امانگەلدى، تولاعاي بازىلحان، تۇرار راحىمبەرلين، «اردا»، «الداۆا»، «ميستەريونس» توپتارىنىڭ ونەرىن تاماشالايتىن بولادى.