زىلتەمىرشى ۆ. سەدوۆقا ريو وليمپياداسىنا قاتىسۋ ءۇشىن تاعى ءبىر مۇمكىنشىلىك بەرىلەدى

استانا. قازاقپارات - زىلتەمىرشى ۆلاديمير سەدوۆقا ريو-دە-جانەيرو وليمپياداسىنا قاتىسۋ ءۇشىن تاعى ءبىر مۇمكىنشىلىك بەرىلەدى.

بۇل تۋرالى ۇلتتىق وليمپيادالىق كوميتەتتىڭ باسپا ءسوز قىزمەتىنەن حابارلادى.

كوميتەت اقپاراتىنا قاراعاندا، بۇگىن ق ر ۇلتتىق وليمپيادا كوميتەتىنىڭ پرەزيدەنتى تيمۋر قۇلىبايەۆ پەن ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى ريو-دە-جانەيرودا وتەتىن جازعى وليمپيادا ويىندارى قارساڭىندا ەل قۇراماسىمەن كەزدەسۋ وتكىزگەن.

«وليمپيادا ويىندارىنا اۋىر اتلەتتەرىمىزدىڭ دايىندىق ماسەلەسى تالقىلاندى. قۇرامانىڭ ناقتى قۇرامى سپورتتىق ۇستانىم بويىنشا ايقىندالاتىن بولادى. ۇلتتىق قۇراما كومانداداعى باسەكەلەستىكتى ارتتىرۋ ءۇشىن بارلىق ۇمىتكەرلەردى، ونىڭ ىشىندە 2009-جىلعى الەم چەمپيونى ۆلاديمير سەدوۆتى دا «باقىلاۋ زىلتەمىر كوتەرۋ» شاراسىنا جىبەرۋ تۋرالى شەشىم قابىلدادى»، - دەلىنگەن حابارلامادا.

ەستەرىڭىزگە سالا كەتەيىك، تاياۋدا اۋىر اتلەتيكا بويىنشا قازاقستان چەمپيوناتىندا ۆلاديمير سەدوۆ جارىس الاڭىنا شىعىپ، شتانگانى كوتەرمەي قويدى. سونداي-اق ول ۇستىندەگى فۋتبولكاسىن شەشىپ، كورەرمەندەرگە قاراي: «مىنە، وليمپيادا چەمپيونى!» دەپ لاقتىرعان. باپكەرلەر بۇل ونىڭ كيىمىنە قاتىستى ايتىلعان سىنعا جاۋابى ەكەنىن جەتكىزدى. جانكۇيەرلەر ونىڭ فۋتبولكاسىنان لوندونداعى ويىنداردا يليا يليننەن ۇتىلعان رەسەيلىك شتانگاشىنىڭ سۋرەتىن بايقاعان ەدى.

وسى وقيعاعا وراي تۇسىنىك بەرگەن ق ر اۋىر اتلەتيكا بويىنشا باس باپكەرى الەكسەي ني: «بۇنداي پسيحيكالىق اۋىتقۋشىلىقتار سپورتشىدا ءجيى بولىپ تۇرادى. باسەكەگە توزە المايدى. اينالاداعىنىڭ ءبارى كىنالى. ونىڭ اشۋى كەنەتتەن پايدا بولادى. ونى باقىلاپ، قاشان بولاتىنىن بولجاۋ مۇمكىن ەمەس. ونى دايىندىقتان جانە ريو-دە-جانەيرو وليمپياداسىنا قاتىسۋدان شەتتەتەمىز. سپورتشى مۇنداي پسيحيكالىق جاعدايىمەن ەلىمىزدىڭ نامىسىن قورعاي المايدى. وليمپيادادا وسى قىلىعىن قايتالاسا، قازاقستاندى جەرگە قاراتادى»، - دەگەن بولاتىن.

اۆتور: مارلان جيەمباي