نۇرسۇلتان نازاربايەۆ پەن ۆلاديمير پۋتين اراسىندا قالىپتاسقان قاتىناستار سەنىم مەن ءوزارا تۇسىنىستىكتىڭ ۇلگىسى

استانا. قازاقپارات - نۇرسۇلتان نازاربايەۆ پەن ۆلاديمير پۋتين اراسىندا قالىپتاسقان قاتىناستار سەنىم مەن ءوزارا تۇسىنىستىكتىڭ ۇلگىسى.

قازاقستان رەسپۋبليكاسى پرەزيدەنتىنىڭ حالىقارالىق ماسەلەلەر بويىنشا كومەكشىسى نۇرلان ونجانوۆ «ەگەمەن قازاقستان» گازەتىندە جارىق كورگەن «نۇرسۇلتان نازاربايەۆتىڭ حالىقارالىق كەلىسسوزدەرىنىڭ كوزگە كورىنبەيتىن قىرلارى» دەگەن تاقىرىپتاعى ماقالاسىندا وسىلاي دەپ جازادى.

«2015-جىلدىڭ 9-10- شىلدەسىندە ۋفا قالاسىندا وتكىزىلگەن بريكس پەن ش ى ۇ سامميتتەرى كەزىندە ورىن العان ءبىر جايت نۇرسۇلتان نازاربايەۆ پەن ۆلاديمير پۋتيننىڭ ەرەكشە دوستىق قاتىناستارىنىڭ جارقىن ايعاعى بولىپ تابىلادى. قازاقستان مەن رەسەي كوشباسشىلارىنىڭ ەكىجاقتى كەزدەسۋىنە توقتالعاندى ءجون كورىپ وتىرمىن. وسىندا قازاقستان-رەسەي كوپ قىرلى ىنتىماقتاستىعىن دامىتۋداعى ەڭبەگى، سونداي-اق، ينتەگراتسيالىق ۇدەرىستەردى ىلگەرى جىلجىتۋ جونىندەگى ەكىجاقتى ءوزارا ءىس-قيمىلعا قوسقان بەلسەندى ۇلەسى ءۇشىن نۇرسۇلتان نازاربايەۆقا الەكساندر نيەۆسكي وردەنى تابىس ەتىلدى. ونىڭ ۇستىنە، بريكس پەن ش ى ۇ شەڭبەرىندەگى بارلىق رەسمي شارالار بىتكەننەن كەيىن ۆ. پۋتين مەن ن. ءا. نازاربايەۆ شاعىن ورتادا قالىپ، ول ارادا رەسەي پرەزيدەنتى نۇرسۇلتان ءابىش ۇلىن وتكەن تۋعان كۇنىمەن قۇتتىقتادى، ولار بەيرەسمي جاعدايدا بىرگە بولىپ، اڭگىمە-دۇكەن قۇردى. بۇل رەسمي حاتتاما شەڭبەرىنەن تىس جاعدايدا ورىن الدى. بۇل ەكى دوستىڭ شۇيىركەلەسە ديدارلاسۋى بولاتىن، - دەپ اتاپ وتەدى ن. ونجانوۆ.

ونىڭ پايىمىنشا، نۇرسۇلتان نازاربايەۆ پەن ۆلاديمير پۋتين اراسىندا قالىپتاسقان قاتىناستار سەنىم مەن ءوزارا تۇسىنىستىكتىڭ ۇلگىسى بولىپ تابىلادى. ولار ەكى ەلدىڭ ۇزاق عاسىرلارعا سوزىلاتىن بەرىك ستراتەگيالىق ارىپتەستىگى مەن وداقتاستىعىنىڭ ىرگەتاسىن قالاۋدا.

جالپى العاندا، ن. ونجانوۆتىڭ ەسكە سالۋىنشا، 2015-2016-جىلدارى قازاقستان مەن رەسەي پرەزيدەنتتەرى ەكىجاقتى جانە كوپجاقتى پىشىمدە 20 رەتتەن استام كەزدەستى.

نۇرسۇلتان نازاربايەۆ پەن ۆلاديمير پۋتين ە ا ە ك (4 رەت)، ۇ ق ش ۇ (2 رەت)، ت م د (2 رەت)، ش ى ۇ (2 رەت) جوعارى قۇرىلتايشى ورگاندارىنىڭ جانە باسقا وڭىرلىك ءارى حالىقارالىق ۇيىمداردىڭ وتىرىستارى اياسىندا دا كەزدەستى. 2015-جىلدىڭ 16- قىركۇيەگىندە سوچيدە قازاقستان مەن رەسەيدىڭ جىل سايىنعى ءوڭىرارالىق فورۋمى بولىپ ءوتتى. بۇگىندە شەكارالىق فورۋم ءوڭىرارالىق ىنتىماقتاستىق فورۋمى بولىپ وزگەرگەن، جانە قازاقستان مەن رەسەيدىڭ ستراتەگيالىق ارىپتەستىگىن نىعايتۋ مەن دامىتۋعا ۇلكەن ۇلەس قوسۋىن جالعاستىرىپ كەلەدى.

اۆتور: مارلان جيەمباي