بوكستان الەم چەمپيونى دينا جولامانعا كۋلاگين پاتەر سىيلادى - فوتو
«مەملەكەت باسشىسىنىڭ استانا ازىق-تۇلىك بەلدەۋىن جاساۋ جونىندەگى تاپسىرماسى اقمولا وبلىسىنا جۇكتەلگەن ابىرويلى مىندەت سانالادى. جاۋاپتى ىسكە ءوڭىردىڭ بارلىق اۋداندارى قاتىسىپ، نىسانالى جۇمىستار اتقارىلۋدا. ەل تاۋەلسىزدىگىنىڭ 25 جىلدىعى قارساڭىندا اقمولالىق سپورتشىلارىمىز ۇلكەن بەلەستەرگە قول جەتكىزۋدە. بۇل جەتىستىكتەردى وبلىسىمىزدىڭ ءاربىر تۇرعىنى سەزىنۋى ءتيىس!»، - دەدى كۋلاگين.
سالتاناتتى جيىندا ءوڭىر باسشىسى كۋلاگين ءبىر اي بۇرىن ەلوردادا وتكەن الەم چەمپيوناتىندا توپ جارعان اقمولالىق بوكسشى دينا جولامانعا وبلىس ورتالىعىنان ەكى بولمەلى پاتەردىڭ كىلتىن جانە 2 ميلليون تەڭگەنىڭ سەرتيفيكاتىن تابىس ەتتى. دينانىڭ باپكەرى الەكساندر ۆىسوتسكيگە العىس حات پەن اقشالاي سەرتيفيكات تاپسىرىلدى.
«ۇلكەن سپورتقا قادام باسقان ءار جاستىڭ اسىل ارمانى - چەمپيون بولۋ. سول ءۇشىن دە تەر توگىپ، ەڭبەكتەنەمىن. جاتتىقتىرۋشىم الەكساندر ۆىسوتسكي تەك ۇيرەتىپ قانا قويمايدى، اربىرىمىزگە ءوزىنىڭ بالاسىنداي قامقورلىق تانىتادى. قاتال دا بولا الادى، تالاپ تا قويا بىلەدى. ەڭ باستىسى، ادامنىڭ بويىنا سەنىمدىلىكتى ۇيالاتا الادى. مەن ەشقاشان ەرىنگەن ەمەسپىن، كۇنىنە قانشا رەت جاتتىعۋ قاجەت بولسا، سونشا رەت جاتتىقتىم. التىن مەدال الۋ جولىنا 9 جىل دايىندالدىم. ادام الدىنا ماقسات قويسا، المايتىن قامالى جوق!»، - دەدى دينا جولامان قۋانىشتى ءسات ۇستىندە.
بۇل كۇنى ءوڭىردىڭ الەۋمەتتىك-ەكونوميكالىق دامۋىنا ۇلەس قوسقان ءبىر توپ ازاماتى وبلىس اكىمىنىڭ العىس حاتىمەن ماراپاتتالدى. سونداي-اق ستەپنوگورسك قالاسىنداعى «ايبىن» رەسپۋبليكالىق اسكەري-پاتريوتتىق جاساعىنا وبلىس اكىمىنىڭ العىس حاتى مەن 2 ميلليون تەڭگەنىڭ سەرتيفيكاتى تابىس ەتىلدى.
ءوڭىر باسشىسى ايتىپ وتكەندەي، قازىرگى تاڭدا اقمولا وبلىسى استاناعا ازىق-تۇلىك تاۋارلارىن جەتكىزۋشى جەتەكشى بۋىنعا اينالىپ وتىر. بيىل وڭىردەن ەلوردامىزعا 94 مىڭ توننا ءسۇت، 22,2 مىڭ توننا ەت، 222,5 ميلليون دانا جۇمىرتقا، 85 مىڭ توننا كارتوپ پەن 26 مىڭ توننا كوكونىس جەتكىزۋ جوسپارلانعان.
