بەيبىت ىستىبايەۆ: «قازاقستان بارىسىن» قويىپ، ەندى «الەم بارىسىنا» دايىندالامىن

استانا. قازاقپارات - بەيبىت ىستىبايەۆ ەندىگى كۇنى «قازاقستان بارىسىن» قويىپ، «الەم بارىسىنا» بارىنشا دايىندالماقشى.

بۇل تۋرالى بۇگىن ورتالىق كوممۋنيكاتسيالار قىزمەتىندە «قازاقستان بارىسى-2016» رەسپۋبليكالىق تۋرنيرىنىڭ قورىتىندىسىنا ارنالعان بريفينگتە «قازاقستان بارىسى-2016» تۋرنيرىنىڭ جەڭىمپازى وسىلاي ءمالىم ەتتى.

«وسى جولى تۋرنيردەن سوڭ «قازاقستان بارىسىنان» كەتەتىن شىعارمىن دەپ ايتقان بولاتىنمىن، ءبىراق ءالى ول تۋرالى تۇپكىلىكتى شەشىم قابىلداعان ەمەسپىن. دەگەنمەن، الداعى ۋاقىتتا «قازاقستان بارىسى» تۋرنيرىنە كۇرەسپەۋىم مۇمكىن، دەگەنمەن «الەم بارىسىنا» قاپتىسسام دەگەن ويدامىن»، - دەدى ب. ىستىبايەۆ.

ونىڭ ايتۋىنشا، كەلەسى جىلى «الەم بارىسى» وتەدى.

«بۇعان دەيىنگى «الەم بارىسىن» كۋبا بالۋانى الىپ كەتكەن بولاتىن. سول ءالى ەسىمنەن كەتپەيدى. كەتكەن ەسەنى قايتارسام با دەپ ويلايمىن. تەك سوعان عانا جۇمىس ىستەگەندى ءجون ساناپ ءجۇرمىن. سوندىقتان دا، سوڭعى ەكى- ءۇش جىلدا نەگىزىنەن وسى باعىتتا جۇمىس ىستەپ جاتىرمىن. «قازاقستان بارىسى» سەكىلدى تۋرنيرلەردە ءوزىمدى سوعان دايىندىق رەتىندە سىناپ كەلەمىن. مەنىڭ باستى ماقساتىم - وسى»، - دەدى ب. ىستىبايەۆ.

ەسكە سالساق، جاقىندا استانادا وتكەن التىنشى «قازاقستان بارىسى-2016» رەسپۋبليكالىق ءتۋرنيرىنىڭ جەڭىمپازى بەيبىت ىستىبايەۆ اتانعان بولاتىن. بەيبىت ىستىبايەۆ وسىعان دەيىن 2012 جانە 2015 -جىلى «قازاقستان بارىسى» اتاعىنا قول جەتكىزگەن ەدى. تۋرنير جەڭىمپازى ب. ىستىبايەۆقا 25000000 تەڭگە، التىن تايتۇياق جانە استانادان ءبىر بولمەلى پاتەر بەرىلدى. ەكىنشى ورىن العان جۇمانازار ەرسۇلتانوۆقا 5500000 تەڭگە، ءۇشىنشى ورىن العان ايبول ايتبەككە 1800000 تەڭگە كولەمىندە سىيلىق تابىستالدى.

اۆتور: قانات مامەتقازى ۇلى