استانا وپەرا تەاترى دون كيحوت بالەتىن قويۋعا دايىندالۋدا

استانا. قازاقپارات - «استانا وپەرا» تەاترىنىڭ ءتورتىنشى ماۋسىمى ل. مينكۋستىڭ «دون كيحوت» بالەتىنىڭ تۇساۋكەسەرىمەن باستالىپ، قالا قوناقتارى مەن تۇرعىندارىن قۋانىشقا بولەمەكشى، دەپ حابارلايدى تەاتردىڭ باسپا ءسوز قىزمەتى.

بالەتتى قويۋشى بالەتمەيستەر - رەسەيدىڭ حالىق ءارتىسى، «استانا وپەرا» بالەتتىك ترۋپپاسىنىڭ كوركەمدىك جەتەكشىسى التىناي اسىلمۇراتوۆا.

جارقىراعان، ءازىل مەن قۇشتارلىققا تولى بالەتتىڭ ادامدى قۋانىشقا بولەيتىن ساتيراسى مەن سارقىلمايتىن قۋاتى نازارىمىزدى، يسپاندىق جازۋشى ميگەل دە سەرۆانتەستىڭ ماڭىزىن جويمايتىن الەمدىك ادەبيەتتەگى ەڭ تانىمال شىعارمالارىنىڭ ءبىرى «لامانچالىق ايلاكەر يدالگو دون كيحوت» رومانىنا اۋدارتادى.

الايدا بالەتتىڭ روماننان ايىرماشىلىعى - باستى نازاردا، رومانداعىداي، قايعىلى بەينەدەگى رىتسار دون كيحوت ەمەس، تراكتيرشىنىڭ قىزى كيتري مەن شاشتاراز بازيلدىڭ ماحابباتى جايلى وقيعا. ءرىتساردىڭ ەل كەزبەلىگىنىڭ ارقاسىندا كەيىپكەرلەر ءومىردىڭ قيىندىقتارىن جەڭىپ، نەكەلەسەدى. بۇل سپەكتاكلدە ماحاببات وقيعاسى قيال مەن ارمانعا ءجيى اۋىسىپ وتىرادى. دون كيحوتتىڭ سۇيىكتىسى دۋلسينەيامەن (كيتري) دۋەتى درامالىق ايقىندىلىقتى جانە كەيىپكەرلەردىڭ سيپاتىن اشىپ كورسەتەدى. كيتريدىڭ ءرولى اسىرا سىلتەلمەگەن، وعان ەرەكشە ماعىنالى جاۋاپكەرشىلىك ارتىلعان - ەرجۇرەك رىتسار دون كيحوتتىڭ جالعان الەمىمەن سالىستىرعاندا، جەڭىلتەك ءارى ۇشقالاق، كوڭىلدى بويجەتكەن شىنايى الەمنىڭ بەينەسىنە اينالادى.

«بيىل «دون كيحوت» بالەتىنە 147 جىل تولادى. بالەتتىڭ ۇزاق جىل ماڭىزىن جويماۋىنىڭ قۇپياسى - كۇلكىلى قىرلارى مەن سەزىمگە تولىلىعىندا. اسقاقتاعان سىعان بيلەرى، دون كيحوتتىڭ تۇسىنە ەنەتىن عاجايىپ دريادالار، ءبىر جارىم عاسىر بويى كورەرمەندى جالىقتىرماي كەلەدى. مەن الەكساندر گورسكييدىڭ وڭدەۋىن نەگىزگە الدىم، سپەكتاكل ەكى بولىمنەن تۇرادى. سىعان ءبيى وزگەرتىلەدى، بۇل جولى قيمىل- قوزعالىس ارتاتىنىنا ۇمىتتەنەمىن. ەر سوليستتەردىڭ سانى دا كوبەيتىلەدى. بۇل جولى كورەرمەن تورەادور ەسپادانىڭ بيشىمەن ءدۋەتىن بۇرىنعىداي كاباكتا ەمەس، ۇيلەنۋ تويى كورىنىسىندە تاماشالايدى. ءبىرىنشى پەردەدە كەيىپكەر كلاسسيكالىق ءبيشى رەتىندە شىقسا، كەيىن وزگەشەلەنەدى»، - دەيدى التىناي اسىلمۇراتوۆا.

«استانا وپەرا» تەاترىنىڭ بارلىق جەتەكشى سوليستەرى مەن سوليستەرى باستى پارتيالاردا باق سىناپ كورەتىندىگى بەلگىلى. ولاردىڭ كوپشىلىگى بۇل سپەكتاكلدە ونەر كورسەتكەندىكتەن، تاجىريبەلەرى بار. ماسەلەن، قازاقستاننىڭ ەڭبەك سىڭىرگەن قايراتكەرلەرى گاۋھار ۋسينا، مادينا باسپايەۆا كيتري ءرولىن ءتۇرلى ساحنالاردا بىرنەشە رەت سومدادى.

«جەتەكشى بيشىلەرمەن قيىندىق جوق، ال نەگىزگى پارتيالارداعى - قيالشىل دون كيحوت، سانچو پانسا، باي گاماشپەن - جاقسىلاپ جۇمىس ىستەۋگە تۋرا كەلەدى. بارلىق كەيىپكەرلەر كورنەكتى، بەينەلى بولۋى كەرەك. وتە ماڭىزدى وبراز بولىپ تابىلاتىن دۆوريان گاماشقا قاراپ، ءبىرىنشى ءبولىمنىڭ ءساتتى ەكەنىن ايتۋعا بولادى. ەگەر، ءبىرىنشى بولىمدە بەينە اشىلماسا، ءبىرىنشى ءبولىمدى جوق دەي بەرىڭىز. مەنىڭ قانداي دا ءبىر «قىزىقتى ايلالار» ويلاپ تاپقىم كەلەدى، الايدا بارلىعى وتە جوعارى تالعاممەن جاسالۋى كەرەك. كورەرمەن بارسەلونانىڭ قايناعان ومىرىنەن كورىنىس تاماشالاي الادى، ساحنانىڭ ءار جەرىندە، ءار بۇرىشىندا ءومىر قايناپ جاتادى. سونىمەن قاتار، سپەكتاكلگە مىندەتتى تۇردە بالالار دا قاتىسادى»، - دەيدى بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆا.

كوستيۋمدەر مەن دەكوراتسيالاردى ەلوردا حالقىنا بەلگىلى يتالياندىق شەبەرلەر - «وسكار» سىيلىعىنىڭ يەگەرى فرانكا سكۋارچاپينو مەن ەتسيو فريدجەريو دايىندايدى.

سپەكتاكل بيىل كۇزدە 28-29 -قازاندا قويىلادى.