الماتىدا ۇيلەردىڭ كىرەبەرىسىندەگى كامەرالاردى ۇرلاپ جۇرگەن جىگىت ۇستالدى

الماتى. قازاقپارات - الماتىدا تۇرعىن ۇيلەردىڭ كىرەبەرىسىندەگى بەينەباقىلاۋ كامەرالارىن ۇرلاۋمەن اينالىسقان ازامات ۇستالدى.

بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.

ەستەرىڭىزگە سالا كەتەلىك، بۇل بەينەباقىلاۋ كامەرالارى تۇرعىن ۇيلەردىڭ كىرەبەرىستەرىنە «قاۋىپسىز اۋلا» قالالىق باعدارالماسى اياسىندا ورناتىلعان بولاتىن.

«بەينەباقىلاۋ كامەرالارىنىڭ ۇرلانىپ جاتقانى تۋرالى كەلىپ تۇسكەن ارىزدار نەگىزىندە سوتقا دەيىنگى تەرگەۋ امالدارى باستالدى. جەدەل- ىزدەستىرۋ شاراسى بارىسىندا الماتى قالاسىنىڭ جەتىسۋ اۋدانىندا تۇراتىن 25 جاستاعى م. ەسىمدى ازامات ۇستالدى. ازىرگە ونىڭ بەينەباقىلاۋ كامەرالارىن ۇرلاۋ بويىنشا ءۇش دەرەككە قاتىسى بار ەكەندىگى انىقتالدى. ارىز بەرۋشى فيرما قاسكۇنەمنىڭ كەلتىرگەن شىعىنىن - 180 مىڭ تەڭگەگە باعالادى. كۇدىكتى ۋاقىتشا تەرگەۋ اباقتىسىنا توعىتىلدى. ءىس سوتقا جىبەرىلەتىن بولادى»، - دەدى الماتى قالاسىنىڭ تۇركىسىب اۋداندىق ىشكى ىستەر باسقارماسىنىڭ باستىعى، پوليتسيا پودپولكوۆنيگى دانيار مەندەبايەۆ.

اۆتور: ايبوتا جاپپاربەرگەن