ريودا تۋ ۇستاۋ ءۇشىن رۋسلان جاپاروۆتىڭ نە سەبەپتى تاڭدالعانى بەلگىلى بولدى

استانا. قازاقپارات - كەشە اقوردادا ريو وليمپياداسىنا باراتىن سپورتشىلارمەن كەزدەسكەن ەلباسى نۇرسۇلتان نازاربايەۆ سالتاناتتى تۇردە قازاقستان تۋىن تاەكۆوندوشى رۋسلان جاپاروۆقا تابىستادى.

وسىدان كەيىن الەۋمەتتىك جەلىلەردە «نەگە تۋدى باسقا تانىمال سپورتشىلارعا بەرمەيدى؟»، «بوكسشىلاردىڭ ءبىرى ۇستاۋى كەرەك ەدى» دەگەن سياقتى ءارتۇرلى وي- پىكىرلەر كوتەرىلدى. وسى سۇراقتارعا جاۋاپ ىزدەپ، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنە حابارلاسقان ەدىك.

«رۋسلان جاپاروۆتىڭ كوك بايراعىمىزدى وليمپيادا ويىندارىندا كوتەرىپ شىعۋى جاي كەزدەيسوقتىق ەمەس. سەبەبى، ول بىرىنشىدەن وتە تالانتتى سپورتشى. ەگەر قاتارداعى جاي سپورتشى بولسا، وليمياداعا جولداما الا الماس ەدى. بۇگىندە تاەكۆوندوشىلارىمىزدىڭ ەنشىسىندە 3 جولداما بار. سونىڭ ءبىرى وسى رۋسلان باۋىرىمىزعا تيەسىلى. ءبىز ريودا جاپاروۆ باۋىرىمىزدان دا ءۇمىت كۇتەمىز»، - دەپ اتاپ ءوتتى سپورت جانە دەنە شىنىقتىرۋ ىستەرى كوميتەتىنىڭ باسپا ءسوز حاتشىسى باقىتبەك حاميت.

ونىڭ ايتۋىنشا، تۋ كوتەرەتىن سپورتشى پسيحولوگيالىق تۇرعىدان دا وتە تۇراقتى بولۋى ءتيىس. سەبەبى، تۋ كوتەرىپ ۇزاق قاتاردا تۇرۋ ادامنىڭ جۇيكەسىنە سالماق سالادى.

«بۇل ازامات وسى تالاپقا دا ساي كەلەدى. ۇشىنشىدەن، رۋسلاننىڭ جارىس كەستەسىنە سايكەس شارشى الاڭعا شىعاتىن كۇنى باسقا سپورتشىلارعا قاراعاندا ارىرەك. وليمپيادا باستالعاننان كەيىن 3-4 كۇننەن كەيىن جارىسقا شىعادى. سوندىقتان ادەيى رۋسلاندى تاڭدادىق. ال سىزدەر ويلاعان سپورتشىلاردىڭ بارلىعى بۇگىن تۋ كوتەرسە، ەرتەسى جارىسقا شىعاتىن بولدى. تۋ كوتەرگەن سپورتشى سالتاناتتى اشىلۋ راسىمىندە 7-8 ساعات تىكەسىنەن تىك تۇرادى. ول جاقتا كۇن وتە ىستىق. ساعاتتاپ تۇرۋ سپورتشىعا وتە ۇلكەن سالماق تۇسىرەدى. شارشاتادى. ول ەرتەسى جارىستا اسەر ەتۋى مۇمكىن. سول ءۇشىن تۋ كوتەرگەننەن كەيىن جارىسقا اسىقپاي شىعاتىن رۋسلاندى تاڭدادىق»، - دەدى باسپا ءسوز حاتشىسى.

اۆتور: كۇنسۇلتان وتارباي