ەلوردا تورىندە حالىق اندەرى مەن كۇيلەرى ورىندالدى

استانا. قازاقپارات - بۇگىن «سەرپەر» حالىق اسپاپتار وركەسترلەرىنىڭ مۋزىكالىق فەستيۆالى اشىلدى.

قازاقستاندىق جانە رەسەيلىك ۇجىمدار حالىق اندەرى مەن شىعارمالارىن، كۇيلەر ورىندادى، دەپ حابارلايدى ەلوردالىق اكىمدىكتىڭ باسپا ءسوز قىزمەتى.

فەستيۆال شىمىلدىعىن ديريجەر نۇرلان بەكەنوۆ جەتەكشىلىك ەتكەن استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى اشتى.

تىڭدارماندار نازارىنا نۇرعيسا تىلەنديەۆتىڭ بەلگىلى شىعارمالارى، قۇرمانعازى مەن تاتتىمبەتتىڭ كۇيلەرى، سونداي- اق، نۇرلان بەكەنوۆتىڭ «شاحنازار» دەپ اتالاتىن اۆتورلىق كومپوزيتسياسى ۇسىنىلدى.

ۇجىمداردىڭ ونەرىن تاماشالاۋعا ق ر حالىق ءارتىسى نۇرعالي ءنۇسىپجانوۆ پەن ك س ر و حالىق ءارتىسى، وپەرا ءانشىسى بيبيگۇل تولەگەنوۆا شاقىرىلدى.

استانا قالاسىنىڭ مەملەكەتتىك فيلارمونياسى قازاق وركەسترىنىڭ ديرەكتورى سابىرجان سەيتحان ۇلىنىڭ ايتۋىنشا، فەستيۆالدىڭ نەگىزگى مىندەتى قازاقستاننىڭ عانا ەمەس، سونىمەن قاتار، باسقا مەملەكەتتەردىڭ وركەسترلەرى مەن مۋزىكانتتارىنىڭ باسىن قوسۋ بولىپ تابىلادى.

- بىزدە 350 مۋزىكانت بار، سونىڭ ىشىندە رەسەيدەن، باشقۇرتستاننان كەلگەندەر دە بار. ءبىزدىڭ ماقساتىمىز ولاردىڭ باسىن قوسۋ، بىرىكتىرۋ، - دەدى ول.

ەرتەڭ شاراعا قاتىسۋشىلار «ستۋدەنتتىك» جانە «اراي» پاركتەرىندە ونەر كورسەتەدى. قالا تۇرعىندارى مەن قوناقتارى تۇرماعامبەت اتىنداعى حالىق اسپاپتار وركەسترى ( قىزىلوردا قالاسى)، ك. كۇمىسبەكوۆ اتىنداعى اقمولا وبلىستىق فيلارمونياسىنىڭ قازاق حالىق اسپاپتار وركەسترى (كوكشەتاۋ قالاسى)، ابىل تاراق ۇلى اتىنداعى قازاق حالىق اسپاپتار وركەسترى (اقتاۋ قالاسى) جانە بايجىگىت اتىنداعى حالىق اسپاپتار وركەسترىنىڭ (وسكەمەن قالاسى) ونەرىن تاماشالايدى. سونداي- اق باشقۇرتستان رەسپۋبليكاسىنىڭ ۇلتتىق حالىق اسپاپتار وركەسترى (ر ف) جانە ومبى قالاسىنىڭ «لاد» ورىس كامەرالىق وركەسترى (ر ف) ونەر كورسەتەدى.

6 -شىلدەدە قالالىق الاڭدا وتەتىن گالا- كونتسەرتتە ءبىر ۋاقىتتا 7 وركەستر، 300 گە جۋىق مۋزىكانت كۇيلەر ورىندايتىن بولادى.