بالا داۋىسى بايقاۋىنىڭ فينالىندا تاعى ءبىر تريو الماتى وبلىسىنىڭ اتىنان ءان شىرقايدى
سەگىزىنشى ايماقتىق ىرىكتەۋ تالدىقورعان قالاسىندا ءوتتى. تىركەۋدەن كەيىن «بالا داۋىسىنىڭ» كۇندەلىكتەرىن جۇرگىزەتىن ايدا مەن باۋىرجان قاتىسۋشىلاردى تاڭ سارىدەن قارسى الىپ، ولاردى ويىندارعا، فلەشموبتار مەن تەلەتۇسىرىلىمدەرگە تارتۋمەن بولدى. ءوز ۆوكالدىق قابىلەتتەرىن سىناپ، گراند- فينالدا ءوز ءوڭىرىن تانىتۋ قۇقىعىنا كۇرەسۋ ءۇشىن بۇكىل الماتى وبلىسىنان 105 بالا جەتىسۋدىڭ كىندىگىندە جينالدى.
بايقاۋدىڭ 10 جاسار قاتىسۋشىسى تەمىرلان كابۋل كاستينگكە جامبىل اۋدانىنداعى قاراساي اۋىلىنان كەلدى. تەمىرلان ۆوكالمەن كاسىبي تۇردە 4 جاسىنان باستاپ شۇعىلدانىپ كەلەدى. ونىڭ اتا- اناسى ەرلان مەن زاۋرە يبراگيموۆتار ۇلدارىنىڭ مۋزىكالىق بىلىمىنە باستى نازار اۋدارادى. «ءبىز بەكەرگە كەلگەن جوقپىز دەپ ەسەپتەيمىز! ءبىزدىڭ بالالارىمىز ناعىز جۇلدىزداردى ءوز كوزدەرىمەن كورىپ، بالالاردىڭ وزدەرىنەن دە ناعىز جۇلدىزدار سىندى سۇحبات الىنىپ جاتتى - بۇل بالالارعا دا، بىزگە دە ارنالعان مەرەكە! بارلىق انالار مەن اكەلەرگە ايتارىم: ەڭ باستىسى - بالانىڭ تالانتىن دەر كەزىندە تاني ءبىلۋ. ويتكەنى ءاربىر ادام دۇنيەگە كەلگەن كەزدە وعان وزىنە ءتان بەلگىلى ءبىر قاسيەت بەرىلەدى. ال اتا- انانىڭ باستى مىندەتى- سول قابىلەتتى اشا ءبىلۋ. ال بۇل بايقاۋ- تابىسقا جەتەلەيتىن تاعى دا ءبىر قادام»، - دەدى تەمىرلاننىڭ اكەسى.
8 جاسار الۋا ابدىكارىممەن بىرگە بايقاۋعا بۇكىل وتباسى كەلدى دەۋگە بولادى: باۋىرى، ءسىڭىلىسى مەن ەكى اپايى. سولاردىڭ ءبىرى ءاليا قاسىمبەكوۆانىڭ ايتۋىنشا، «ءبىز ءوز سىڭىلىمىزگە قولداۋ كورسەتۋگە كەلدىك، بارلىعىمىز قوبالجىپ تۇرمىز، ول، ارينە، بىزدەن قاتتىراق تولعانىپ تۇر. سىڭىلىمىزگە جانە بارلىق قاتىسۋشىلارعا ساتتىلىك تىلەيمىز!». بەكارىس قادىربايەۆ تالدىقورعانداعى كاستينگكە ىلە اۋىلىنان ءوز پەداگوگى راۋشان شىنىبايەۆامەن بىرگە كەلدى. بەكارىس 11 جاستا، ول كلاسسيكالىق مۋزىكانى، پوپ- مۋزىكا مەن حيپ- حوپتى تىڭدايدى. «ماعان ءارتۇرلى مۋزىكا ۇنايدى. قازاقتىق حالىق اندەرىن جاقسى كورەمىن، كورەرمەندەردىڭ الدىندا ونەر كورسەتكەندى جانىم سۇيەدى. مەن ناعىز اتاقتى ءارتىس بولامىن!» - دەپ بالا ءوز سەنىمدىلىگىن ءبىلدىردى.
«الاۋ» توبىنىڭ ءسوليستى مەن الماتى وبلىسىنىڭ «بالا داۋىسىنىڭ» تالىمگەرى اسەت ارىستانبەككە تاڭداۋ جاساۋ وڭاي بولعان جوق. ايىم ەلتاي قىزى، ءامىر قايسار مەن نۇرجان ءابىلقاسىموۆتان تۇراتىن ۇشتىكتىڭ قۇرامىنان اسەت تە، مۋزىكالىق پروديۋسەرلەر دە ءبىر جەڭىمپازدى ءبولىپ جارا المادى. ويتكەنى ۇشەۋىنىڭ دە مۋزىكالىق جانە ارتىستىك قابىلەتتەرى ءمىنسىز، سونىمەن قاتار تالانتتارى دا ءارقىرلى. سوندىقتان قازىلار القاسى ۇشتىك قۇرۋ تۋرالى شەشىم قابىلدادى. بۇل ۇشتىكتىڭ استانادا وتەتىن «بالا داۋىسىنىڭ» گراند- فينالىن كوركەيتە تۇسەرى ءسوزسىز.
ءامىر قايسار 5 جاسىنان باستاپ ءان شىرقايدى، قازىر ول «بي-بي» ستۋديوسىندا ءوز ونەرىن شىڭداۋدا. بالانىڭ انگە دەگەن اۋەستىگى ونىڭ اجەسى مەن اتاسىنان دارىعان. ءامىردىڭ رەپەرتۋارى نەگىزىنەن كلاسسيكالىق اندەردەن تۇرادى، بۇل اندەر ونىڭ تامىلجىعان داۋسىن اشا تۇسەدى. كەز كەلگەن ۇل بالا سياقتى ءامىر فۋتبول ويناعاندى ۇناتادى. نۇرجان ءابىلقاسىموۆ 9 شەت تىلىندە ءان ايتۋعا دەگەن دايىندىعىمەن قازىلار القاسىن تاڭعالدىردى. نۇرجان اكادەميالىق ۆوكالعا جانە فورتەپيانوداعى ويىنعا مۋزىكالىق مەكتەپتە ۇيرەنىپ ءجۇر، ال بوس ۋاقىتىندا ۆولەيبول كومانداسىندا وينايدى. بۇعان قوسىمشا بالا «مەن جۇلدىزبىن» بالالار ستۋديوسىنا بارادى، بۇل ستۋديوعا ءۇشىنشى جارتىلاي فينالعا قاتىسۋشى - ايىم ەلتاي قىزى دا بارادى ەكەن. ايىم ەكى مۋزىكالىق اسپاپتى مەڭگەرگەن: دومبىرا مەن فورتەپيانو. نۇرجان مەن ايىم وسى جەڭىسكە جەتۋلەرى مۋزىكالىق پەداگوگتارى سەرىكجامال اسىبەكوۆانىڭ ارقاسىندا دەپ ەسەپتەيدى.
جارتىلاي فينالعا قاتىسۋشىلاردىڭ تريوسىن الماتىداعى مۋزىكا مەكتەبىندە اۋقىمدى فينالعا دايىقتىق جۇمىسى كۇتىپ تۇر. بايقاۋدىڭ شەشۋشى كۇنى بالالار كورەرمەندەر الدىندا ارنايى فينالعا جازىلعان 16 ءاننىڭ ءبىرىن ورىنداپ شىعادى. ال ازىرگە «بالا داۋىسى» ءارى قاراي جول تارتادى: 9 -شىلدەدە ءان بايقاۋى قازاقستاننىڭ باس قالاسى - استاناعا ات باسىن تىرەيدى.
