قازاقستان پاريج كليماتتىق كەلىسىمىنە قوسىلۋ ءراسىمىن اياقتاپ كەلەدى - ق. بوزىمبايەۆ
بۇگىن استانادا قازاقستان پرەمەر-ءمينيسترى كارىم ءماسىموۆتىڭ توراعالىعىمەن ءوتىپ جاتقان ق ر پرەزيدەنتى جانىنداعى «جاسىل ەكونوميكاعا» كوشۋ جونىندەگى كەڭەستىڭ ءتورتىنشى وتىرىسىندا ەنەرگەتيكا ءمينيسترى قانات بوزىمبايەۆ وسىلاي ءمالىم ەتتى.
ءمينيستردىڭ ايتۋىنشا، پاريج كليماتتىق كەلىسىمىن ىسكە اسىرۋ قازاقستان ءۇشىن ماڭىزدى مىندەتتەردىڭ ءبىرى. «پاريج كەلىسىمى بازاسىندا «جاسىل ەكونوميكاعا» كوشۋ جول كارتاسىن ازىرلەپ، تابيعي رەسۋرستاردى ءتيىمدى پايدالانۋ ماسەلەلەرى جۇكتەلگەن بولاتىن. ەنەرگەتيكا مينيسترلىگى پاريج كليماتتىق كەلىسىمىنە قوسىلۋعا باعىتتالعان جۇيەلى جۇمىستار مەن «جاسىل ەكونوميكاعا» كوشۋ تۇجىرىمداسىن جۇزەگە اسىرىپ كەلەدى. بىلتىرعى جىلدىڭ قىركۇيەگىندە وتكەن كەڭەس وتىرىسىندا پارنيكتىك گازداردى 90-جىلداردىڭ دەڭگەيىنە قاراعاندا 2030-جىلعا قاراي ءسوزسىز ماقسات رەتىندە 15 پايىز، شارتتى ماقسات رەتىندە 25 پايىزعا ەرىكتى تۇردە تومەندەتۋ تۋرالى شەشىم قابىلداندى»، - دەدى ق. بوزىمبايەۆ.
ونىڭ ايتۋىنشا، بۇگىنگى كۇنى ەلباسىنىڭ پاريج كەلىسىمىنە قوسىلۋ تۋرالى جارلىعىنىڭ جوباسى ازىرلەندى.
ءمينيستردىڭ مالىمەتىنشە، قازاقستاندا 1990-2014-جىلدار ارالىعىندا شىعارىندىلاردى 3,18 ميلليارد تونناعا ازايتتى. سونىمەن ءبىر مەزگەلدى ابسوليۋتتىك شىعارىندىلار كولەمى ەنەرگو قامتىمدىلىقتىڭ تومەندەۋىنە قاراماستان 2001-2015 -جىلدار ارالىعىندا 2,1 ەسەگە ارتقان. «شىعارىندىلاردىڭ ۇلكەن كولەمى قازاقستادا ەنەرگەتيكا سالاسىنا عانا تيەسىلى ەمەس، ونەركاسىپ پەن اۋىل شارۋاشىلىعىنا دا بۇنىڭ قاتىسى بار»، دەدى ق. بوزىمبايەۆ.
ەسكە سالايىق، 2016-جىلعى 29- ماۋسىمداعى جاعداي بويىنشا پاريج كەلىسىمىنە الەمنىڭ 178 مەملەكەتى قول قويعان، ونىڭ ىشىندە 19 ەل ب ۇ ۇ دەپوزيتتەرىندە راتيفيكاتسيالاۋ قۇجاتتارىن ۇسىنعان.
اۆتور: قانات مامەتقازى ۇلى
