م. ايتجانوۆ ريو وليمپياداسىنداعى جەڭىستەرىن كوگىلدىر ەكراننان جولداۋعا ۋادە ەتتى

استانا. قازاقپارات - بۇگىن اقوردادا ەلباسى نۇرسۇلتان نازاربايەۆتىڭ ريو وليمپياداسىنا باراتىن سپورتشىلارمەن كەزدەسۋى بارىسىندا بوكستان قازاقستان ۇلتتىق قۇراماسىنىڭ اعا جاتتىقتىرۋشىسى مىرزاعالي ايتجانوۆ ريو وليمپياداسىنداعى جەڭىستەرىن كوگىلدىر ەكراننان جولداۋعا ۋادە ەتتى.

«بايراقتى باسەكەدە ەلىمىزدىڭ نامىسىن قورعاۋ بارىمىزگە زور مارتەبە ءارى ۇلكەن جاۋاپكەرشىلىك. 31- جازعى وليمپيادا ويىندارى تاۋەلسىزدىگىمىزدىڭ 25 جىلدىعىنا تۇسپا-تۇس كەلىپ وتىر. بۇل ءبىزدىڭ ەلىمىز قاتىسىپ وتىرعان 12- وليمپيادا. ءبىز 6 رەت قىسقى، 5 رەت جازعى وليمپياداعا قاتىستىق. وندا 59 مەدال الدىق، ونىڭ 17- التىن بولدى. بۇل جەڭىستى جول بيىل دا جالعاساتىندىعىنا سەنەمىز. ءسىز تاۋەلسىزدىك جىلدارىندا وتاندىق سپورتقا بارلىق جاعدايدى جاسادىڭىز. ءسىزدىڭ قامقورلىعىڭىزبەن ەلىمىز الەمدەگى سپورتتىق دەرجاۆالاردىڭ بىرىنە اينالدى. سول ءۇشىن سىزگە شەكسىز العىسىمىزدى بىلدىرەمىز. سىزبەن كەزدەسۋدەن قاناتتانعان سپورتشىلار الدىڭعى التىن بۋىننىڭ جولىن جالعاستىرادى دەپ سەندىرگىم كەلەدى»، - دەدى ول.

سونىمەن قاتار ول قازىرگى تاڭدا وتاندىق سپورت جۋرناليستيكاسى قارقىندى دامىپ كەلە جاتقاندىعىن ايتا كەلە، مەملەكەت باسشىسىنا «قازسپورت» تەلەارناسى ءۇشىن راحمەت ايتتى. «جەڭىستەرىمىزدى بارشاڭىزعا كوگىلدىر ەكراننان جولدايمىز. ءبىز ءسىزدىڭ سەنىمىڭىزدى، ەل سەنىمىن اقتاۋعا بار كۇشىمىزدى سالامىز»، - دەدى م. ايتجانوۆ.

اۆتور: مارلان جيەمباي