باتىر ارۋلار بايقاۋىنىڭ جەڭىمپازدارى جاۋىنگەرلىك سىناق تاپسىرۋدا - فوتو

استانا. قازاقپارات - «باتىر ارۋلار» بايقاۋىنىڭ جەڭىمپازدارى وزدەرىنىڭ ناعىز جاۋىنگەر ەكەنىن دالەلدەۋدە.

بۇل تۋرالى ق ر قورعانىس مينيسترلىگىنىڭ فەيسبۋكتەگى پاراقشاسىندا جاريا ەتىلدى.

«باتىر ارۋلار» بايقاۋىنىڭ ماقساتى ايەل اسكەري قىزمەتشىلەر اراسىنداعى ەڭ سۇلۋدى انىقتاۋ ەمەس، نازىك جاندىلاردىڭ جاۋىنگەرلىك ازىرلىگىن، رۋحىن شىڭداۋ ەدى.

80 نەن اسا قاتىسۋشىلاردان وق بويى وزىپ شىققان 12 اسكەري قىز- كەلىنشەك اق جاۋلىقتى انا، يبالى كەلىن، اياۋلى جار عانا ەمەس ەل قورعاعان «جاۋىنگەر» ەكەنىن كەزەكتى مارتە دالەلدەدى.

جۋىردا ولار بىرنەشە كۇردەلى سىناقتاردان ءوتتى.

وق اتىپ، گراناتا لاقتىردى. سۋ بوگەتتەرىنەن ءجۇزىپ، پاراشيۋتپەن سەكىردى. كەدەرگىلەر جولاعىنان مۇدىرمەي ءوتتى. وسىلايشا، رەسمي ماراپاتتاۋعا دەيىن بايقاۋ فيناليستەرى دالا جاعدايىندا اسكەري تاسىلدەر مەن جاتتىعۋلاردى ورىندادى.

ايتا كەتەيىك، قازىرگى ۋاقىتتا جەڭىمپازدار ارنايى فوتوسەسسياعا قاتىسۋدا. ولاردىڭ بەينەلەرى فوتوالبومدار مەن كۇنتىزبە پاراقتارىنا باسىلىپ شىعادى.

ەسكە سالا كەتسەك، بايقاۋعا عالامتوردا داۋىس بەرۋ ءساۋىردىڭ 1 ى مەن مامىردىڭ 31 ى ارالىعىندا قورعانىس مينيسترلىگىنىڭ سايتىندا جۇرگىزىلدى. بۇل ۋاقىت ىشىندە ۇمىتكەرلەرگە 253 مىڭ رەكوردتىق داۋىس بەرىلدى.

«باتىر ارۋلار» رەسپۋبليكالىق بايقاۋىنىڭ قاتىسۋشىلارى - ق ر قارۋلى كۇشتەرىنىڭ ايەل اسكەري قىزمەتشىلەرى، وزىندىك ەكسپەريمەنت وتكىزىپ، «ولاردىڭ بالالارى كوزدەرى بايلاۋلى كۇيىندە ءوز انالارىن تابا الا ما، الدە جوق پا؟» دەگەن سۇراقتىڭ جاۋابىن ىزدەپ كورگەن بولاتىن.