اتى الەمگە ايگىلى امەريكالىق مارافونشى وڭتۇستىك قازاقستان وبلىسىنىڭ جاستارىمەن بىرگە جۇگىردى - كەسكىن

استانا. قازاقپارات - وڭتۇستىك قازاقستان وبلىسى سارىاعاش اۋدانىنىڭ جىبەك جولى كەدەن بەكەتىنەن اتى الەمگە ايگىلى ا ق ش- تىڭ ۋلترامارافونشىسى دين كارناسيستى اۋدان تۇرعىندارى مەن سپورتشىلارى سالتاناتتى تۇردە كۇتىپ الدى.

قازاقستان رەسپۋبليكاسى مەن امەريكا قۇراما شتاتتارىنىڭ مەملەكەتتەر اراسىنداعى ديپلوماتيالىق ارا قاتىناسىنىڭ 25 جىلدىعىنا وراي، امەريكاندىق جۇگىرۋ مارافونشىسى دين كارناسيس ۇلى جىبەك جولىنىڭ قازاقستان، وزبەكستان، قىرعىزستان رەسپۋبليكالارىن 29- ماۋسىم مەن 10- شىلدە ارالىعىندا جۇگىرىپ وتپەك. ۋلترامارافون ا ق ش مەملەكەتىنىڭ دەمەۋشىلىگىمەن ەكى ەل اراسىنداعى ديپلوماتيالىق اراقاتىناستىڭ 25 جىلدىعى اياسىندا وتكىزىلۋدە.

جۇگىرۋدى تاشكەنت قالاسىنان باستاعان دين كارناسيس قازاقستان ارقىلى قىرعىزستان رەسپۋبليكاسىنا جەتىپ، قايتا قازاقستان رەسپۋبليكاسىنا ورالىپ، الماتى قالاسىندا مارافوندى اياقتاۋدى جوسپارلاپ وتىر.

ال سارىاعاش اۋدانىنان جۇگىرىپ وتكەندە سپورتشى ونداعى جەرگىلىكتى جاستارمەن، ستۋدەنتتەرمەن جانە وسى سپورت تۇرىنە قىزىققان جۇرتشىلىقپەن بىرگە مەجەلى جەردى جۇگىرىپ ءوتتى، دەپ حابارلايدى و ق و اكىمىنىڭ باسپا ءسوز قىزمەتىنەن.