اتىراۋدىڭ بالىق ونىمدەرىنە شەتەلدىكتەردەن سۇرانىس جوعارى

استانا. قازاقپارات - وسىدان بىرنەشە جىل بۇرىن اتىراۋ وبلىسىنا اۋىلشارۋاشىلىق ونىمدەرى سىرتتان تاسىمالدانىپ كەلسە، قازىر ايماقتاعى جاعداي مۇلدەم باسقا.

ءوڭىر ءوزىن قاجەتتى ونىممەن قامتاماسىز ەتىپ قانا قويماي، ەكسپورتقا جول سالا باستادى. وبلىستاعى تابىستى جۇمىس ىستەپ تۇرعان نىسانداردىڭ ءبىرقاتارىن ءماجىلىس دەپۋتاتتارى جۇمىس ساپارى كەزىندە ارالاپ، تىنىس- تىرشىلىگىمەن تانىستى. اتىراۋ وبلىسىندا سوڭعى بەس جىلدا ەت جانە ءسۇت ونىمدەرىن وندىرەتىن نىساندار مەن بىرنەشە ءتۇرلى ازىق- تۇلىك تاۋارلارىن شىعاراتىن كاسىپورىندار ىسكە قوسىلدى.

وتكەن جىلى وندىرىلگەن اۋىلشارۋاشىلىعى ءونىمىنىڭ كولەمى 52 ميلليارد تەڭگەنى قۇرادى. ماسەلەن، مىناۋ بالىق شارۋاشىلىعىندا جىلىنا 100 مىڭ بەكىرە تۇقىمدى شاباقتار وسىرىلەدى. سونىمەن قاتار 100 تونناداي بەكىرە ەتى مەن 1 توننا قارا ۋىلدىرىق دايىندالادى.

التىناي سۇگىراليەۆا، بالىق ءوسىرۋشى:

- مۇندا ورىس، ءسىبىر، اقسەركە، سۇيرىك سياقتى بالىقتىڭ ءتورت ءتۇرى وسىرىلەدى. قازىر كاسىپورىن ەندى- ەندى اياققا تۇرىپ كەلەدى. تولىقتاي وندىرىستىك قۋاتتا شامامەن 3 جىلدىڭ ىشىندە شىعاتىن بولامىز.

فەرما زاماناۋي ۇلگىدە سالىنعان. سۋمەن قامتاماسىز ەتۋ جۇيەسى تولىقتاي تۇيىقتالعان. جاڭا قوندىرعىلاردىڭ كومەگىمەن جىل مەزگىلدەرىن جاساندى تۇردە ەنگىزۋگە بولادى. وسىنىڭ ارقاسىندا بەكىرەلەردىڭ ۇرىقتانۋ كەزەڭى قىسقارادى.

ەرسۇلتان بەكتۇرعانوۆ، ق ر پارلامەنتى ءماجىلىسىنىڭ دەپۋتاتى:

- بۇل ءوڭىر نەگىزىنەن مۇناي سالاسىنا كوپ كوڭىل بولەتىن، تەك مۇناي ساتۋ ماسەلەسىمەن اينالىساتىن، ال باسقا جەڭىل ونەركاسىپ باسقا ەلدەردەن، باسقا جەرلەردەن كەلەتىن. ەندى بۇگىن ءبىز اتىراۋ وبلىسىنىڭ اۋىلشارۋاشىلىق ونىمدەرىمەن تولىق قامتىلعانىن كورىپ وتىرمىز. ونىڭ ۇستىنە جەڭىل ونەركاسىپ زاتتارىن دا شىعارىپ جاتىر.

قازىر ءوڭىر ءوز- ءوزىن قامتاماسىز ەتىپ قانا قويماي، كورشى وبلىستاردىڭ نارىعىنا دا شىعارۋدا. اتىراۋلىق بالىق ونىمدەرىن شەتەلدىكتەر دە جاقسى بىلەدى. سۇرانىس تا بار.

www.24.kz