قازاقستاندىقتار قادىر ءتۇنىن قالاي قارسى الدى؟ - فوتو
قادىر ءتۇنى - رامازان ايىنىڭ ىشىندەگى قادىرلى ءتۇن. ءبىراق، ناقتى قاي ءتۇنى ەكەنى بەلگىسىز. يسلام عۇلامالارىنىڭ مالىمەتى بويىنشا، قادىر ءتۇنى رامازان ايىنىڭ سوڭعى ون كۇنىندە جاسىرىلعان. قاسيەتىمەن زور ماعىناعا يە تۇندە العاش رەت قۇران سۇرەلەرى جەرگە تۇسىرىلگەن. سوندىقتان، مەيىلىنشە دۇعا ەتىپ، قۇلشىلىقپەن وتكىزگەن ابزال.
قاسيەتتى تۇندە جاسالىنعان ءبىر قۇلشىلىعىمىز 83 جىل جاسالىنعان ءمىناجاتتىڭ ساۋابىنا تاتيدى. سونداي- اق، بۇل كەزدە تۇنىمەن ۇيىقتاماي دۇعا ەتۋ مىندەت ەمەس دەيدى يمامدار. اركىم ءوز شاماسىنا قاراي نيەت ەتەدى. ال، بۇل ءتۇندى قارسى الۋدا كوپشىلىكتىڭ پىكىرى ءارتۇرلى.
قاسيەتتى قادىر ءتۇنى قارساڭىندا شىمكەنتتەگى سىرگەلى بابا مەشىتىندە ادەتتەگىدەي قۇران وقۋ جارىسى ءوتتى. سايىسقا قالامىزدىڭ بارلىق مەشىتتەرىندە ءدىني ءدارىس الىپ جۇرگەن، مەكتەپ جاسىنداعى 50-دەن استام شاكىرت قاتىستى.
كيەلى كىتاپ سۇرەلەرىن جاتقا ايتۋ ساۋاپتى امالداردان ەكەنى بەسەنەدەن بەلگىلى. سوندىقتان بولار، جاس ورەندەر قۇران جاتتاۋدى ادەتكە اينالدىرعان. ايتا كەتەيىك، وبلىستا 256 ساۋات اشۋ كۋرسى جۇمىس ىستەيدى. وعان قاتىسىپ، ءدارىس الۋ تەگىن.
ال جامبىل وبلىسىندا قادىر تۇنىنە وراي قايىرىمدىلىق ناۋقانى ءوتتى دەپ حابارلايدى muftyat.kz.
اتالمىش ناۋقاندا الەۋمەتتىك جاعدايى تومەن، كوپبالالى، مۇقتاج جاندارعا ەت ۇلەستىرىلدى. بۇل ءىس- شارادا 150 وتباسىعا كومەك كورسەتىلدى. ناۋقان بارىسىندا ق م د ب- نىڭ جامبىل وبلىسى بويىنشا وكىل يمامى دانيار قاجى جۇمابايەۆ كوپشىلىككە ورازا ايى تۋرالى جانە قادىر ءتۇنى تۋرالى سۇبەلى ءسوز سويلەدى.
قايىرىمدىلىق نىسانى بولعان جانۇيالار قاسيەتتى قادىر تۇنىنە ارنالعان قايىرىمدى ءىس- شارا ءۇشىن مەشىت اكىمشىلىگىنە العىستارىن ءبىلدىردى.
«ازىرەت سۇلتان» مەشىتىندە قۇران كارىم حاتىم باتاسى جاسالدى. ق م د ب- نىڭ ءتوراعاسى، باس ءمۇفتي ەرجان قاجى مالعاجى ۇلى مەشىتكە كەلگەن مىڭداعان جاماعاتپەن بىرگە ەلىمىز بەن جەرىمىزدىڭ اماندىعىن تىلەپ، قاسيەتتى ءقادىر تۇنىندە باتا جاسادى.
بۇدان سوڭ «ازىرەت سۇلتان» مەشىتىنىڭ جاماعاتىن قاسيەتتى رامازان ايىندا اسەرلى قىراعاتىمەن ۇيىتىپ، تاراۋيح نامازىنا يمامدىق ەتكەن قاريلارعا قۇرمەت كورسەتىلدى. ق م د ب- نىڭ نايب ءمۇفتي، «ازىرەت سۇلتان» مەشىتىنىڭ باس يمامى سەرىكباي قاجى ساتىبالدى ۇلى مەشىتكە جينالعان جاماعاتقا قاريلارىمىزدى قىسقاشا تانىستىرىپ ءوتىپ، ءوز العىسىن ءبىلدىردى. بۇدان سوڭ قازاقى داستۇرىمىزگە ساي قاريلارىمىزعا شاپان جابىلىپ، ارنايى «العىس حات» تابىس ەتىلدى.
ورتالىق ازيا بويىنشا تەڭدەسى جوق الىپ مەشىتتىڭ ىشىندە ينە شانشارلىق ورىن تابۋ قيىن بولدى. قادىرى مىڭ ايدان دا قايىرلى دەپ قۇران كارىمدە باياندالعان قادىر ءتۇنىن قۇلشىلىق ورداسىنا كەلىپ، قۇلشىلىقپەن وتكىزگىسى كەلگەن جاماعاتتىڭ سانىنا جەتۋ قيىن. جاماعات سانىنىڭ جىلدان- جىلعا ارتۋىنا بايلانىستى بىلتىرعى جىلدان باستاپ مەشىت سىرتىنا LED ەكراندار قويىلىپ، قۇلشىلىق ورداسىنا سىيماعان جاندار ىشتەگى وقيعاعا سول جەردەن تاماشالاپ كەلەدى.
«ازىرەت سۇلتان» مەشىتىنە كەلگەن جاماعاتقا مەشىت مىنبەرىنەن تاڭ راۋانداپ اتقانعا دەيىن ۋاعىز جۇمىستارى جۇرگىزىلدى. ءناپىل نامازدار وقىلىپ، جاماعاتپەن بىرگە دۇعا جاسالدى. سونداي- اق، قادىر ءتۇنى جاسالاتىن قۇلشىلىق- عيباداتتار مەن پايعامبارىمىزدىڭ (وعان اللانىڭ يگىلىگى مەن سالەمى بولسىن) حاديستەرىندە كەلگەن دۇعالار جازىلعان پاراقشالار دا تاراتىلعان بولاتىن. وسىلايشا، ءقادىر ءتۇنىن مەيلىنشە ساۋاپقا تولى وتكىزگىسى كەلگەن جاندار ءۇشىن بارىنشا جاعداي جاسالىنعان.
