اقتاۋدا توبەلەسكەن كەلىنشەكتەردىڭ ەكەۋى وزبەكستاننىڭ ازاماتى بولىپ شىقتى

استانا. قازاقپارات - اقتاۋدا تەڭىز جاعاسىندا جاپپاي توبەلەسكەن كەلىنشەكتەر ۇستالدى.

ونىڭ ىشىندە 1983,1988 جانە 1990 -جىلعىلارىنا قاتىستى قىلمىستىق ءىس قوزعالۋى مۇمكىن. ال ەكەۋى وزبەكستاننىڭ ازاماتى بولىپ شىقتى.

بۇل تۋرالى ماڭعىستاۋ وبلىسىنىڭ ىشكى ىستەر دەپارتامەنتىنىڭ باسپا ءسوز قىزمەتى حابارلايدى.

«ق ر قىلمىستىق كودەكسىنىڭ 293-بابىنىڭ 1- تارماعى، ياعني «بۇزاقىلىق بويىنشا» قىلمىستىق ءىس قوزعالدى. توبەلەسكە قاتىسقان كەلىنشەكتەر 2000 ايلىق ەسەپتىك كورسەتكىش كولەمىندە ايىپپۇل تولەپ، (4 ميلليون 242 مىڭ تەڭگە) قوعامدىق جۇمىسقا جەگىلۋى مۇمكىن نەمەسە ەكى جىلعا دەيىن باس بوستاندىعى شەكتەلەدى. وزبەكستان تۇرعىندارىنا دا شەتەلدىك ازامات بولعاندىقتان، قوسىمشا اكىمشىلىك شارا قاراستىرىلعان» - دەيدى وبلىستىق ىشكى ىستەر دەپارتامەنتىنىڭ جەتەكشىسى جازيرا ءابىل.

باسپا ءسوز قىزمەتىندەگىلەر ينتەرنەتتەگى بەينەجازبا سوتتا دايەك رەتىندە قولدانىلاتىنىن ايتتى. تەرگەۋ امالدارى جۇرگىزىلىپ بىتكەن سوڭ ءىس سوتتىڭ قاراۋىنا بەرىلەدى.

ايەلدەر توبەلەسى 24-ماۋسىمدا اقتاۋ قالاسىنىڭ 7 -ىقشام اۋدانىندا بولعان. توبەلەستىڭ سەبەبى بەلگىسىز. بۇل جايتقا بايلانىستى جەرگىلىكتى پوليتسياعا ەشكىم ارىزدانباعان.